भांगरभूंय | प्रतिनिधी
भुंयगत वीज केबल घालपाचें काम कांसवाचे गतीन काम
भांगरभूंय । प्रतिनिधी
माशेल: माशेल पंचायत वाठारांत फाटल्या कांय म्हयन्यां सावन भुंयगत वीज केबल घालपा खातीर रस्ते खणप चालू आसा. साबार वाठारांतले रस्ते खणून दवरिल्ल्यान माशेलांतल्या लोकांक धुल्ल खावचो पडटा. ह्या वावराची गती पळयल्यार फुडल्या पावसाळ्या मेरेन तरी तें पुराय जावपाचीं लक्षणां दिसनात. ते मेरेन हो धुल्लाचो त्रास आनी रस्त्यांचेर पडिल्ल्या फोंडकुलांचो त्रास सोंसचो पडटलो, हे खातीर ह्या वाठारांतल्या लोकांनी खर तिडक उक्तायल्या.
माशेल पंचायत वाठारांत भुंयगत वीज केबल घालपा खातीर रस्त्ते खणपाचो वावर चालू आसा. ह्या खणिल्ल्या रस्त्यांक लागून वाहनचालकांक कसरत करची पडटा. तेचवरी चलत वचपी लोकांक जीव मुठींत घेवन चलचें पडटा. ह्या रस्त्या वयल्यान गाडी गेले उपरांत हिसपा भायर धुल्ल उडटा. एका फाटोफाट गाडयो वतकच धुल्लाचें साम्राज्य सगळे कडेन पातळटा. हो धुल्ल लोकांच्या नाकांतल्यान पोटांत वता. भुंयगत वीज केबल घालपाचें काम करपी कंत्राटदाराचेर कोणाचेंच नियंत्रण ना, अशेंच ह्या वाठारांतली परिस्थिती पळयल्यार दिसता.
माशेल ही म्हत्वाची सुवात. ह्या वाठारांत दर दिसा लोकांचें तशेंच वाहनांचें व्हड प्रमाणांत यो वच सता. ह्या वाठारांतल्यान शाळेंत, म्हाविद्यालयांत वचपी विद्यार्थ्यांक ह्या रस्त्या वयल्या फोंडकुलांचो त्रास सोंशीत आनी धुल्ल खायत येवचें पडटा. ताका लागून तांच्या गणभेसाचो रंग लेगीत बदलता. ह्या धुल्लाच्या प्रदुशणाक लागून त्या विद्यार्थ्यांच्या पालकांनी तांचे भलायके बाबतींत हुस्को उक्तायला.
कंत्राटदाराचे मनमानीक लागून हो वावर कांसवाचे गतीन चल्ला. ताका गती दिवपाचें कोणाकूच पडूंक ना. हे खातीर थळाव्या लोकांनी तशेंच बाजाराक येवपी लोकांनी नाराजी उक्तायल्या.
माशेल पंचायत वाठारांत विवीध आस्थापनां आसा. तेच वरी नुस्तें मार्केट लेगीत ह्याच वाठारांत आसा. ह्या धुल्लाक लागून मालाचें खूब लुकसाण जाता अशें विक्रेत्यांनी प्रतिनिधी कडेन उलयतना सांगलें.
माशेल हो देवळांचो गांव. ताका लागून दर दिसा शेंकड्यांनी भावीक ह्या वाठारांतल्या देवळांनी येतात. तांकांय ह्या खणिल्ल्या रस्त्यांचो आनी धुल्लाचो त्रास सोंसचो पडटा. ह्या खणिल्ल्या रस्त्यांचे कुशीक ह्या कामा खातीर हाडिल्लें सामान तशेंच पडून आसा. तातूंत कावलाक उडोवपाच्या वस्तूंचोय आस्पाव आसा. त्या सामानांचो येरादारीक आडखळ जाता. खूब खेपे येरादारीची कोंयडी लेगीत जाता. तरी लेगीत संबंदीत कंत्राटदारान तें सामान काडून व्हरपा कडेन पुराय आडनदर केल्या.
आमदारान दखल घेवपाची मागणी
ह्या वाठाराचे आमदार तशेंच कला आनी संस्कृती मंत्री गोविंद गावडे हांणी स्वता ह्या वाठाराक भेट दिवची. तशेंच लोकांक आनी वाहनचालकांक, विद्यार्थ्यांक, घरांतल्या बायलांक, विक्रेत्यांक जावपी त्रासाची पळोवणी करची. आमदार गावडे हांणी हे समस्येचेर ताकतिकेन उपाय सोदचो, अशी मागणी ह्या वाठारांतल्या लोकांनी, विद्यार्थ्यांनी तशेंच विक्रेत्यांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
