भांगरभूंय | प्रतिनिधी
जेटी भायर पुलीस, केंद्रीय उद्देगीक सुरक्षा दळ जवानांचें संरक्षण
भांगरभूंय । प्रतिनिधी
मुरगांवः मुरगांव हार्बर क्रूज जेटीचेर देशी पर्यटकांक घेवन कोर्डियला बोट मंगळारा दाखल जाली. ह्या वेळार ह्रार्बर जेटी भायर मुरगांव पुलीस आनी केंद्रीय उद्देगीक सुरक्षा दळाचे जवान व्हड प्रमाणांत तैनात दवरिल्ले.
मुरगांव बंदरांतले पर्यटक क्रूज जेटीचेर देशी- विदेश पर्यटक बोटी पर्यटकांक घेवन गोंय भोंवडे खातीर येतात. फाटल्या सप्तकांत आंतरराष्ट्रीय ओसियन पर्यटक बोटींतल्या पर्यटकांनी गोंय भोंवडे खातीर पर्यटक बशींतल्यान वचपाचें थारायिल्लें. पूण पर्यटक बस हार्बर क्रूज जेटीचेर येनासतना भायरूच राविल्ली. ताका लागून टॅक्सीकारांक दिसलें, ते पर्यटक गोंय भोंवडे खातीर टॅक्सी करतले. पूण ते पर्यटक हार्बर क्रूज जेटी वयल्यान थेट पर्यटक बशींत चडपाक लागले, तेन्ना थळाव्या टॅक्सीकारांनी तांकां बशींत चडपा पसून आडायले. उपरांत त्या पर्यटकांनी गोंय भोंवडी रद्द करून परतून बोटींत वचून बसप पसंत केलें.
अखेर हें प्रकरण अमेरिका दुतावास कार्यालयांत पाविल्लें. हें प्रकरण खुबूच गंभीर आशिल्ल्यान मुरगांवचे भाजपा आमदार संकल्प आमोणकार हांकां ह्या प्रकरणांत पर्यटकांची जाहीर माफी मागची पडिल्ली. मंगळारा देशी पर्यटक बोट हार्बर क्रूज जेटीचेर दाखल जाली तेन्ना वास्को येरादारी पुलीस निरिक्षक शैलेश नार्वेकार, मुरगांव पुलीस निरिक्षक राघोबा कामत, दाबोळी पुलीस निरिक्षक विनायक पाटील आनी केंद्रीय उद्देगीक सुरक्षा दळाचे जवान व्हड संख्येन जेटी भायर हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
