भांगरभूंय | प्रतिनिधी
उपसरपंचपदाचेर रुचिरा मळीक बिनविरोध
भांगरभूंय । प्रतिनिथी
पेडणें: चांदेल हसापूर पंचायत मंडळाची हालींच सरपंच आनी उपसरपंच पदाखातीर नवनिर्वाचीत पंच वांगड्याची 21 डिसेंबराक बसका जाली. पंचायत कार्यलयांत आयोजीत केल्ले बसकेंत सरपंचपदा खातीर तुळशीदास गांवस हांची निवड जाली. जाल्यार उपसरपंचपदा खातीर रुचिरा मळीक हांची निवड जाली. दोनूय पदां खातीर एकेकूच उमेदवारी अर्ज दाखल जाल्ल्यान दोगांचीय बिनविरोध निवड जाली.
पंचायत वाठाराची सर्वांगी उदरगत करचे खातीर सरकाराचो तशेंच थळावे आमदार प्रवीण आर्लेकार हांचो आदार घेतलों. पेडणें म्हालांतल्या नियोजीत प्रकल्पांतल्यान बेरोजगारांक संदी दिवपाचेय आपूण यत्न करतलों. आपूण सरपंच जावचो हे खातीर आमदार आर्लेकार हांणी आदार केलो. तेचवरी सगळ्या नवनिर्वाचीत पंच वांगड्यांनी आपल्याचेर ह्या पदा खातीर विस्वास दाखयला. त्या विस्वासाक आपूण पात्र थारतलों, अशें सरपंच पदाचेर निवड जाले उपरांत गांवस हांणी सांगलें. आमदार आर्लेकार हांणी नवनिर्वाचीत सरपंच, उपसरपंच आनी पंच वांगड्यांची भेट घेवन तांकां शुभेत्सा दिल्यो. ह्या वेळार तांणी सांगलें, वेंचणुके आदीं आपणे लोकांक बदल करपाचो उलो मारिल्लो. ते प्रमाण लोकांनी आपल्याक जाय त्या पंचांक वेंचून हाडल्यात. पंचायत वाठाराची उदरगत करपाची जशी पंचायत मंडळाची आसा, तशीच ती आमदाराचीय आसा, आनी सरकाराच्या माध्यमांतल्यान आपूण ती करतलों, अशें आर्लेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
