भांगरभूंय | प्रतिनिधी
भांगरभूंय । प्रतिनिधी
पोरणें गोंयः चिंबल पंचायत वाठारा खातीर समग्र ग्राम पंचायत उदरगत येवजण (जीपीडीपी) तयार करपाची मागणी फाटल्या आयताराक जाल्ले चिंबल पंचायत ग्रामसभेंत ग्रामस्थांनी केली. सध्या पंचायत मंडळ फकत गटार आनी पेव्हर बसोवपाचें काम करता. पंचायत वाठारांत कितें जाय ते समजून घेवपा खातीर सर्वे करून समग्र जीपीडीपी तयार करपाची सूचोवणी ग्रामस्थांनी केली.
रिव्होलुशनरी गोवन्साचो थळावो फुडारी अजय खोलकार हांणी जीपीडीपींत पंचायत वाठाराचे सर्वांगी उदरगतीचेर भर दिवपाक जाय अशें सागून भलायकी, शिक्षण, नितळसाण. बायलांचें सक्षमीकरण, रोजगाराचेर चड लक्ष दिवपाची सूचोवणी करून ते संबंदीं आपलो दस्तावेज पंचायत मंडळाक सादर केलो. पंचायत मंडळान सादर केल्ल्या जीपीडीपींत गटार, पेव्हर कामाचेर चड भर दिला. पंचायत मंडळान जीपीडीपी तयार करपाक जाय ते खातीर विशेश समितीची गरज ना असें खोलकारान सांगलें. ग्राम उदरगत समितींतल्यान आपलें नांव काडिल्ले खातीर ताणे पंचायत मंडळचेर फोग काडलो.
ग्राम उदरगत समितीक वांगडा घेवन सर्वे केल्या उपरांत जीपीडीपी तयार करपाचें उतर सरपंच संदेश शिरोडकार हांणी ग्रामसभेंत दिलें. इंदिरा नगरांतल्या बेकायदेशीर गाड्याचो प्रश्न ग्रामसभेंत चर्चेंत आयलो. पंचायत मंडळ ह्या गाड्या विशीं कसलीच कारवाय कित्याक करना अशे प्रश्न लोकांनी विचारले. ह्या गाड्याचेर कारवाय करपा संबंदी जिल्होधिकाऱ्याक पंचायत मंडळान पत्र धाडलां अशी म्हायती सरपंचान दिली. गोंय पंचायत राज कायद्याच्या कलम 73 खाला बेकायदेशीर गाडे वा दुकानांचेर कारवाय करपाचो अधिकार पंचायत मंडळाक आसा अशें अजय खोलकारान पंचायत मंडळाचे नदरेक हाडून दिलें.
आमदार रुदोल्फ फर्नांडीस हाणी इंदिरा नगरांत एसटीपी स्थापन करपाचेर ग्रामसभेंत चर्चा जाली. ह्या प्रस्तावाक कोणाचो विरोध ना अशें ग्रामस्थ गोविंद शिरोडकारान सांगलें. इंदिरा नगरांतल्यान शिरांत हांका एमआरएफ सुविधा व्हरपाक थंयच्या लोकांनी विरोध केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
