भांगरभूंय | प्रतिनिधी
भांगरभूंय । प्रतिनिधी
फोंडेंः सावड्डें काँग्रेस गट समिती आनी किर्लपाल पंचायत वाठरांतल्या तरणाट्यांनी गोंय मुक्ती दिसा निमतान वडामळ हांगा सुटके झुजारी ल्हिपून रावतले ते सुवातेर वचून आदरांजली ओपली. तशेंच शेमेल हांगचे दादा भट ऊर्फ रामकृष्ण सहकारी हांची सून कल्पना देसाय हिचो शाल आनी श्रीफळ भेटोवन गौतम भंडारी हांचे हस्तुकीं भोवमान केलो.
ह्या वेळार जयेश पाटील, रोहिदास नायक, संकेत भंडारी, प्रताप देसाय आनी हेर ग्रामस्थ हाजीर आशिल्ले. गोंय मुक्ती खातीर सुटके झुजारी दादा भट हांणी पुर्तुगेज अधिकाऱ्यां आड गुपीत कारवायो केल्लो. जायत्या सुटके झुजाऱ्यांक आनी मजत केली. गोंयांतले आनी हेर राज्यांतले सुटके झुजारी शेमेल वाठारांत संदेश घेवन येताले. हे सुवातेर अजून मेरेन सरकाराचें लक्ष गेल्ले ना. दादा भट हांच्या सारक्या सुटके झुजाऱाच्या घरा मेरेनव वचपा खातीर अजून रस्तो तयार करपाक सरकार अपेशी थारलां, अशें गौताम भंडारीन सांगलें.
वडामळ हांका सुटके झुजाऱ्यांचे यादस्तीक उबरपा खातीर आदले मुख्यमंत्री मनोहर पर्रीकार ते सध्याचे मुख्यमंत्री डॉ प्रमोद सावंत हांचे कडेन फाटपुरवण करून लेगीत सुटेक झुजारी ल्हिपपा खातीर उपेगांत हाडटाले तें घड मोडपा कडेन पावला. ह्या वाठारांतल्या सुटके झुजाऱ्याचें अस्तित्व तिगोवन दवोरपा खातीर हे सुवातेर यादस्तीक जावपाची सामकी गरज आसा अशें जयेश पाटील हांणी सांगलें. प्रताप देसाय, रोहिदास नायक आनी संकेत भंडारीन आपले विचार मांडले. भांडोळ हांगच्या सरकारी प्राथमीक विद्यालयाच्या विद्यार्थ्यांनी सकाळी शाळेंत ध्वजारोहण केल्या उपरांत वडामळ हांगचे इतिहासीक सुवातेर दादा भट हांची सून कल्पना देसाय हिची भेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
