भांगरभूंय | प्रतिनिधी
20 विद्यालयांतल्या 33 विशेश विद्यार्थ्यांनी घेतलो वांटो
वाळपय: होंडाच्या भगवान महावीर सरकारी माध्यमीक विद्यालयांत गोंय समग्र शिक्षा सत्तरी विभाग आयोजीत पर्यावरण अनुकूल वस्तूंचें प्रदर्शन आनी सर्त हालींच आयोजीत केल्ली. ह्या वेळार मुखेल सोयरे म्हणून गोंय समग्र शिक्षाचे राज्य प्रकल्प समन्वयक पुष्पल साखरदांडे, सत्तरी म्हालाचे भाग शिक्षण अधिकारी श्रीरंग बर्वे, सरकारी माध्यमीक विद्यालयाची मुख्याध्यापक मोनाली नायक, सत्तरी विभागाचे कार्यावळ मुखेली बाळकृष्ण गांवस आनी परीक्षक रामा नायक हाजीर आशिल्ले.
स. मा. वि. होंडाच्या विद्यार्थ्यांच्या येवकार गितान आनी मुखेल सोयर्यां हस्तुकीं दिवली पेटोवन कार्यावळ सुरू जाली. कार्यावळीचें प्रास्तावीक बाळकृष्ण गांवस हांणी केलें.
दर वर्सा गोंय समग्र शिक्षा खूबश्यो कार्यावळी पुराय गोंयच्या विद्यालयांनी आयोजीत करता. तशेंच विशेश गरज आशिल्ल्या विद्यार्थ्यांक प्रोत्साहन दिवपाकूय कार्यावळी राबयत आसता. हातूंत भलायकी शिबीर, आलिमको कॅम्प, पर्यावरण जनजागृती, तशेंच विवीध अश्यो खूबश्यो कार्यावळी राबोवन विशेश गरज आशिल्ल्या विद्यार्थ्यां मेरेन सरकाराच्यो येवजण्यो पावयत आसता.
हे कार्यावळींतल्या विशेश विद्यार्थ्यांक पर्यावरण अनुकूल वस्तुंतल्यान आपली कला सादर करपाची सर्त आयोजीत केल्ली. ही सर्त दोन गटांनी जाली. पयलो गट यत्ता पयली ते चोवथी, जाल्यार दुसरो गट यत्ता पांचवी ते आठवी असो आशिल्लो. हातूंत 1ली ते 4थी खातीर विशय ‘नवें वर्स’ आनी 5वी ते 8वे खातीर ‘गोंयची संस्कृती आनी लोकनाच’ अशे विशय आशिल्ले. हे सर्ती खातीर सत्तरीच्या वट्ट 20 विद्यालयांतल्या 33 विशेश विद्यार्थ्यांनी विंगड विंगड मॉडेल प्रदर्शना खातीर दवरिल्ले. सर्तीचेें परीक्षण श्रीरंग बर्वे आनी रामा नायक हांणी केलें.
पयल्या गटांत पयलें इनाम राघोबा गांवकार, दुसरें देवराज गुरव, तिसरें इनाम वेदांत होंडकार, जाल्यार पयलें उमेद वाडोवपी इनाम वेदांत गावडे, दुसरें अवनिश सावंत हांकां फावो जालें.
दुसर्या गटांत पयलें इनाम दिपराज गावडे, दुसरें अभय माजिक, तिसरें राहुल सडेकार, तशेंच पयलें उमेद वाडोवपी इनाम गोपाळ दळवी, दुसरें कुणाल बाणावलीकार हांकां फावो जालें. ह्या वेळार जैतिवंतांक रोख रक्कम, यादस्तीक आनी प्रमाणपत्रां भेटयलीं. तशेंच वांटेकार जाल्ल्या सगळ्या सर्तकांक प्रमाणपत्रां भेटयलीं.
कार्यावळीचें सुत्रसंचालन क्लस्टर रिसोर्स पर्सन गोविंद गांवस आनी उपकार क्लस्टर रिसोर्स पर्सन गौतमी च्यारी हांणी मानले. ही कार्यावळ येसस्वी करपा खातीर गोंय समग्र शिक्षाचे कर्मचारी मानसी गांवस, कविता साळगांवकार,योगिता नायक, प्रमिला गांवस, भारती गांवस, मुबिना शेख, श्रद्धा गांवस, स्वाती अ. परब, दक्षा मळीक हांणी सहकार्य केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
