भांगरभूंय | प्रतिनिधी
राजेंद्र बोंद्रेः कोरगांवच्या श्री कमळेश्वर उच्च माध्यमिकाचें स्नेहसंमेलन उमेदीन
भांगरभूंय । प्रतिनिधी
कोरगांवः सध्याच्या काळांत कुशळटाय शिक्षणाची विद्यार्थ्यांक गरज आसा. गिन्यानाची गिरेस्तकाय सासणा खातीर तिगता. ते खातीर गिन्यानान गिरेस्त जायात, अशें पेडणेंच्या व्हायकावंट हायस्कुलाचे मुख्याध्यापक राजेंद्र बोंद्रे हांणी सांगलें.
कोरगांवच्या श्री कमळेश्वर उच्च माध्यमीक विद्यालयाच्या वर्सुकी स्नेहसंनेलनांत मुखेल सोयरे म्हूण बोंद्रे उलयताले. ह्या वेळार माचयेर खास निमंत्रीत म्हूण कोरगांवचे सरपंच समील भाटलेकार, श्री कमळेश्वर शिक्षण प्रसारक संस्थेचे अध्यक्ष परशुराम गावडे, पालक शिक्षक संघाचे अध्यक्ष धर्मा शेट्ये, वेवस्थापक अरविंद गावडे, उपाध्यक्ष अशोक रेडकार, उपाध्यक्ष कृष्णा शेट्ये, सचीव निळकंठ थळी, भांडारी निळकंठ शेट्ये, जोडसचीव चंद्रकांत शेट्ये, कार्यकारिणी वांगडी नवसो गवस, देवूळवाड्या वयल्या श्री कमळेश्वर हायस्कुलाचे वेवस्थापक केशव शेट्ये, पालक शिक्षक संघाचे अध्यक्ष विजय तुळसकार, प्राचार्य जुही थळी, आदले प्राचार्य सुदन बर्वे, देवूळवाड्या वयल्या श्री कमळेश्वर हायस्कुलाचे मुख्याध्यापक भालचंद्र हिरोजी, पेठेचो वाडाचे मुख्याध्यापक आत्माजी नायक, आदले मुख्याध्यापक लक्ष्मण गावडे, रजनी गावडे आनी हेर मानेस्त हाजीर आशिल्ले.
आमी मेळयिल्ल्या म्हायतीच्या गिन्यानाचें रुपांतर करप म्हणल्यार शिक्षण. फुडारांत कुशळटाय शिक्षणाक म्हत्व येतलें. राष्ट्रीय शिक्षण धोरणांत लेगीत कुशळटाय शिक्षणाक म्हत्व दिलां. ते प्रमाण आमकां 21व्या शेंकड्यांतलें शिक्षण भुरग्यांक दिवपाक जाय. गिन्यानाची गिरेस्तकाय संवसारांत श्रेश्ठ थारल्या, अशें बोंद्रे हांणी सांगलें.
कोरगांवचे सरपंच समील भाटलेकार हांणी सांगलें, मनोहर आंतरराष्ट्रीय विमानतळ, आयुष हॉस्पिटल ह्या सारक्या प्रकल्पांक लागून पेडणें म्हालाचे उदरगतीक गती मेळ्ळ्या. भुरग्यांनी उच्च शिक्षण घेवन आपली कारकीर्द घडोवची. कोरगांव पंचायती वतीन शिक्षणाक सगळे तरेचो आदार करतले, अशें तांणी सांगलें.
परशुराम गावडे हांणी सांगलें, श्री कमळेश्वर उच्च माध्यमीक विद्यालयान आपली 100 टक्के निकालाची पर्जळीत परंपरा तिगोवन दवरल्या. ह्या विद्यालयाचे आदले प्राचार्य सुदन बर्वे आनी अध्यापक विठोबा बगळी ह्या दोगांक राज्य आदर्श शिक्षक पुरस्कार फावो जाल्यात. एकाच विद्यालयांतल्या दोन शिक्षकांक अशे पुरस्कार मेळिल्ले हें विद्यालय गोंयांतलें एकमेव विद्यालय आसा. हाचो आमकां अभिमान आसा. 2024त हे शिक्षण संस्थेक 100 वर्सां पुराय जातली, अशीय म्हायती तांणी दिली.
विद्यार्थ्यांनी सादर केल्ल्या येवकार गितान कार्यावळीची सुरवात जातली. उपरांत मानेस्तांचे हस्तुकीं दिवली पेटयली. इनामां वितरण कार्यावळींत 2021-22 ह्या शिक्षणीक वर्सांत विवीध सर्तींनी आनी खेळांमळाचेर येस मेळयिल्ल्या विद्यार्थ्यांक मानेस्तां हस्तुकीं इनामां भेटयलीं. तशेंच आदर्श शिक्षक पुरस्कार फावो जाल्ले विठोबा बगळी आनी जम्मूंत जाल्ले राष्ट्रीय टेनीस बॉल क्रिकेट सर्तींत पर्जळीत कामगिरी केल्ले खातीर खेळां शिक्षक नेहाल कशालकार हांचो भोवमान केलो. समीर मांद्रेंकार, अंकुश बुगडे, प्रशांत रासयकार, सलुजा पेडणेंकार हांणी सुत्रसंचालन केलें. भारती पंचवाडकार आनी अंकुश बुगडे हांणी शिक्षणीक वर्साचो अहवाल सादर केलो. प्राचार्य जुही थळी हांणी येवकार दिलो आनी प्रास्तावीक केलें. विठाबा बगळी हांणी सोयऱ्यांची वळख करून दिली. दीपश्री सोपटे हांणी उपकार मानले. ते उपरांत विद्यार्थ्यांनी विवीध सांस्कृतीक कार्यावळी सादर केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
