सत्तरींत रवींद्र भवन उबारपा खातीर यत्न

भांगरभूंय | प्रतिनिधी

डॉ. देविया राणेः 12 व्या रणमाले महोत्सवाचें पर्यावरणपूरक वातावरणांत उक्तावण

भांगरभूंय । प्रतिनिधी

वाळपयः सत्तरी म्हालांत रवींद्र भवन उबारून ह्या म्हालांतल्या कलाकारांक बरी माची मेळोवन दिवचे खातीर आपूण यत्न करतली. तशी प्रक्रिया सुरू जाल्या. हें कला भवन निर्माण जालें जाल्यार ह्या वाठारांतले कलाकार राज्य आनी राष्ट्रीय पांवड्याचेर आपली वळख निर्माण करतले, अशें पर्येंची आमदार तशेंच गोंय रान उदरगत म्हामंडळाची अध्यक्ष डॉ. देविया राणें हांणी सांगलें.

चरावणे सत्तरीच्या श्री सांतेरी केळबाय देवळाच्या प्राकारांत उबारिल्ल्या खाशेल्या माटवांत रणमाले महोत्सव आयोजीत केल्लो. पुराय पर्यावरणपूरक वातावरणांत आयोजीत केल्ल्या ह्या महोत्सवाचें डॉ. राणे हांचे हस्तुकीं उक्तावण जालें. ह्या वेळार ती उलयताली.

रणमाले हो विशिश्ट असो प्रकार आसा. फुडारांत ह्या महोत्सवा फाटल्यान आपूण घट उबी रावतली. गोंय ही कलाकारांची खण. परंपरीक कला तिगून उरचे खातीर प्रतापसिंह राणे हांणी लेगीत म्हत्वाचें योगदान दिलां. पाश्चात्य संस्कृतीच्या आकर्शणाक लागून आमची संस्कृती नश्ट जाता काय कितें असो प्रस्न निर्माण जाल्लो. मात रणमाले महोत्सवाच्या माध्यमांतल्यान ही परंपरीक कला परतून एकदां नव्या दमांत आमचे मुखार येता, ही खऱ्यांनीच कवतुकाची गजाल. गोंय कला आनी संस्कृतीक खात्यान परंपरीक कला संवर्धीत करचे खातीर अर्थीक फाटबळ दिलां. ताका लागून फुडारांत ह्यो कला परतून एकदां तरणाट्यांक एक वेगळो आदर्श निर्माण करून दितल्यो, अशी आस्त डॉ. राणे हांणी उक्तायली.

फाटल्या 12 वर्सां सावन सत्तरी म्हालांत रणमालें महोत्सवाचें आयोजन जाता. ताका लागून बंद पडिल्ली सत्तरी म्हालांतली ही कला खूबशा गांवांनी परतून एकदां सुरू जाल्या. ही कला पुनर्जिवीत करचे खातीर ग्रामीण कला आनी सांस्कृतीक संस्थेचें म्हत्वाचें योगदान आसा. गोंय कला आनी संस्कृती संचालनालयान हे संस्थेक नेमान अर्थीक फाटबळ दिवन ही कला पुनर्जिवीत करचे खातीर म्हत्वाचें योगदान दिलां. फुडारांतूय अश्यो परंपरीक कला नश्ट जावच्यो नात हाची विशेश दखल घेतले, अशें कला आनी संस्कृती संचालनालयाचे उपसंचालक अशोक परब हांणी सांगलें.

रणमाले हो गोंयांतलो विशिश्ट परंपरीक कलाप्रकार. सत्तरी म्हालांत तो मुखेलपणान दिसता. ज्या वेळार गांवगिऱ्या वाठारांनी मनरिजवणेचीं साधनां नाशिल्लीं त्या वेळार गांवगिऱ्या वाठारांतल्या लोकांनी रणमालेचो सांबाळ केलो. आयज आमकां खूबशीं मनरिजवणेचीं साधनां मेळपाक लागल्यात. ताका लागून हे कले कडेन आडनदर जावपाक लागल्या. तरी लेगीत परंपरीक कला तिगोवन दवरचे खातीर ज्येश्ठ कलाकारांनी आतां मेरेन बरें योगदान दिलां. मात ही कला परतून एकदां विकसीत जावची हे खातीर ग्रामीण कला आनी सांस्कृतीक संस्थेन 12 वर्सां सावन ह्या रणमाले महोत्सवाचें नेमान आयोजन करपाचेर भर दिला, अशें परब हांणी सांगलें.

सरपंच सरिता गांवकार, थळावे पंच विनायक गांवस हांणी ह्या वेळार आपले विचार मांडले. ह्या वेळार ग्रामीण कला आनी संस्कृती संस्थेचे स्थापने खातीर म्हत्वाचें योगदान दिवपी संस्थापक वांगडी कृष्णा गांवस आनी आत्माराम गांवस हांचो मानेस्तां हस्तुकीं भेटवस्तू दिवन भोवमान केलो.

रणमाले महोत्सवा निमतान मांडिल्ल्या परंपरीक आनी आदल्या वस्तूंच्या प्रदर्शनाचें मानेस्तां हस्तुकीं उक्तावण जालें.

ग्रामीण कला आनी संस्कृती संस्थेचे अध्यक्ष अंकुश धुरी हांणी प्रास्तावीक केलें. रणमाले महोत्सवाच्या आयोजना फाटलो हेतू तांणी स्पश्ट केलो. सर्गेस्त रामा धुरी हांच्या नांवान हो महोत्सव दर वर्सां उमेदीन मनयतात. ताका लागून सत्तरी म्हालांतले लोक अजून लेगीत रणमाले हे परंपरीक कलेचेर मना सावन मोग करतात हें सिद्ध जाता, अशें तांणी सांगलें.

ह्या वेळार माचयेर कार्याध्यक्ष अभिषेक गांवस, सचीव प्रकाश गांवकार, देवस्थानाचे पुरयत अर्जुन गांवस, पुरयत गोपाळ गांवस हाजीर आशिल्ले. थळाव्या बायलांनी येवकार गीत सादर केलें. प्रशांत नायक हांणी सुत्रसंचालन केलें. अभिषेक गांवस हांणी येवकार दिलो आनी उपकार मानले.