भांगरभूंय | प्रतिनिधी
सह्याद्रीचे वंये भितर
वाजता पावल म्हादयचें
सत्तरीच्या सालेलींत
विचार गांवमनांचे.
गोय विद्यापिठांतल्यान कोंकणींत पदव्युत्तर शिक्षण घेतना जांकां जांकां डॉ. प्रकाश पर्येंकार हांणी शिकयलां तांचे खातीर सत्तरी तशी परकी न्हय. गुरवार बायलांक गिरणाचे वेद लागतात तें आयकल्लें पूण सत्तरींत कितेंय आसतकच जे वेद पर्येंकार सराक लागता ते सुमारभायले. सत्तरीचें आनी म्हादयचें नांव घेतलें बगर जाचो दीस सरना अशा डॉ. पर्येंकार सरान सत्तरीच्या सालेलींत जावपी ग्रामीण साहित्य संमेलन अणभवपाची संद आपल्या विद्यार्थ्यांक दिली आनी त्याच अणभवांतल्यान बरयल्लो हो लेख . “कोंकणींतल्या ग्रामीण साहित्याचो अभ्यास” हो कोंकणी एम. ए. अभ्यासक्रमांत आसपाविल्लो विशय घेतिल्ल्या विद्यार्थ्यांक तर हे संदीचो फायदो जालो अशें म्हणल्यार अतिताय जावची ना.
एक अणभवी विद्यार्थी म्हूण ह्या ग्रामीण साहित्य संमेलनाची तोखणाय करतां करतां उत्कृश्ट आयोजनाची थाप साहित्य मंथन सत्तरीच्या तशेंच श्री सिध्देश्वर पंगड सालेलीच्या दर वांगड्याच्या फाटीर पडल्या हातूंत दुबाव ना. लाकडां बोरे, खुंटे, चुडटां-मल्लां, करड, शेणयो, वापरून सजयल्ल्या माटवांत चिंचे पोंदा बसून कितल्याशाच नव्या विचारवंतांनी मळिल्ली ग्रामीण विचारांची आमटाण साहित्याच्या पुरमेंताक पुरायपणान पावतली अशें म्हणूं येता. साहित्यीक, वाचक, समिक्षक, आनी ग्रामीण विचार घेवन जगप्यांक एकेच माचयेर हाडून ग्रामीण साहित्याचेर चर्चा जावची ह्या हेतान विंगड विंगड ग्रामीण विशयांनी ह्या संमेलनाचीं सत्रां सुटसुटीतपणान निभावतना दर सत्रांतल्यान गांवमन उक्तें जालें. ह्या ग्रामीण साहित्य संमेलनांत फक्त गिन्यानाची भर पडूंक ना तर मनीसपणाची आनी एकवठाचीय भर पडल्या हाची गवाय म्हळ्यार साहित्य मंथन सत्तरीन जोडिल्लो सालेली गांव. 2011 वर्सा सावन सुरू जाल्लें हें ग्रमीण साहित्य संमेलन दर वर्सा एक एक गांव जोडटा त्या गांवचीं मनशां जोडटा आनी अशे तरेच्या एकवठाक लागुनूच हें संमेलन यशाचे पांवडे चडटा. विशयाक धरून चलपी सत्रां भायरूय गांव अणभवपाची संद हें संमेलन दिता. ताची गवाय म्हळ्यार कापट्यांची माची, तयार केल्लो वाडो, उबे केल्ले राखणे, गांवठी जिनसावळींचो बाजार, रुचीक खाणां-जेवणां, सांस्कृतीक कार्यावळीं सयत सालेलकारांचें रणमालें, सकाळची गांव भोंवडी आनी संमेलन सोंपतां सोंपतां भरून आयिल्लें काळीज.
ह्या वर्सा हें ग्रामीण साहित्य संमेलन संमेलनाध्यक्ष संदेश प्रभुदेसाय, कार्याध्यक्ष गोपीनाथ गांवस, येवकाराध्यक्ष रघुनाथ गांवकार हांच्या अध्यक्षपणा खाला चंवरून येतना सगळ्या विचारवंत मानेस्तांच्या विचारांनी फुल्लां, आनी नव्या साहित्यिकांचे नदरेंत फळ्ळां तर त्या फळाचीं बिंयां निश्चीतपणान फुडल्या ग्रामीण साहित्य संमेलनांत किल्लतलीं हाचो भंरवसो आसा.
सान्वी घ. खांडेपारकार
9923075337
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
