भांगरभूंय | प्रतिनिधी
भौशीक सुवातांचेर पोस्टर लायिल्ल्याचो आरोप; पुलिशेची कारवाय
भांगरभूंय । प्रतिनिधी
म्हापशें: फाटले विधानसभ वेंचणुके वेळार आपल्या पक्षाच्या चिन्ना सयत जायरात प्रचार करून सरकारी आनी भौशीक सुवातेचें विद्रुपीकरण केल्ल्याच्या आरोपा खाला आम आदमी पार्टी (आप) आनी तृणमूल काँग्रेस (टीएमसी) आड पुलिसांनी वट्ट 13 गुन्यांव नोंद केल्यात. पणजी, पोरणें गोंय, म्हापशें, कोलवाळ आनी पेडणें ह्या पुलीस स्टेशनांचेर आपाचेर 12 जाल्यार टीएमसीचेर एक गुन्यांव नोंद केला.
2022 चे विधानसभा वेंचणुके वेळार आप तशेंच टीएमसीन राष्ट्रीय म्हामार्गाच्या उड्डाण पुलांचे वण्टींचेर तशेंच हेर सुवातांचेर प्रचारा निमतान पक्षाच्या चिन्ना सयत हे पोस्टर रंगयिल्ले. ही वेंचणूक जावन खूब दीस जावन लेगीत संबंदीत पक्षांनी तशेंच तांच्या उमेदवारांनी ते पोस्टर काडूंक नाशिल्ले. ताका लागून पुलिसांनी गोंय मालमत्ता विद्रुपीकरण प्रतिबंधक कायदो (जीपीडीपी) 1988 च्या कलम 3 खाला हे सगळे गुन्यांव नोंद केल्यात. म्हापशें पुलीस स्टेशनाचेर 6, पोरणें गोंय पुलीस स्टेशनाचेर 3, पेडणें पुलीस स्टेशनाचेर 2, पणजी आनी कोलवाळ पुलीस स्टेशनाचेर दरेकी एक गुन्यांव नोंद केला.
पणजी पुलीस स्टेशनांत अतिरिक्त जिल्होधिकारी केदार नायक हांच्या जाल्यार पोरणें गोंय पुलीस स्टेशनांत पुलीस उपनिरिक्षक एडवीन डायस, मनीषा पेडणेंकार आनी सहाय्यक उपनिरिक्षक महमद रफीक जांबोटकार हांचे कागाळेच्या आदारान पणजी उड्डाण पूल, मेरशी जंक्शन उड्डाण पूल, नेक्सा शोरून बांबोळी आनी दांत म्हाविद्यालया लागसारच्या उड्डाण पुलाचेर हे पोस्टर लायिल्ल्या प्रकरणांत गुन्यांव दाखल केल्यात.
म्हापशें पुलीस स्टेशनांत पुलीस उपनिरिक्षक सुनील पाटील, उपनिरिक्षक बाबलो परब, हवालदार नंदकिशोर कुडासकार, हवालदार उमेश नायक हांच् कागाळेच्या आदारान नास्नोळें सर्कल, नास्नोळे क्लब, करासवाडो उड्डाण पूल, उसकयचें जागबाई जंक्शन, तार उड्डाण पूल ह्या हळदोणें आनी म्हापशें मतदारसंघांतल्या हेर सुवातांचेर पोस्टर लायिल्ले खातीर आपाचे उमेदवार आनी अज्ञात वांगड्यांचेर गुन्यांव दाखल केला.
कोलवाळ पुलीस स्टेशनांत उपनिरिक्षक सोनम वेरेंकार हांणी पुलाचे वण्टीचेर पोस्टर लायिल्ल्या प्रकरणांत आपाचे अज्ञात वांगडी आनी समर्थकां आड गुन्यांव नोंद केला. पेडणें पुलिसांनी मामलेदार अनंत मळीक हांचे कागाळेच्या आदारान मालपें पेट्रॉल पंपा मुखा वयले सरकारी मालमत्तेचेर आप आनी टीएमसीन पोस्टर लावन विद्रुपीकरण केल्ल्याच्या आरोपा खाला अज्ञातां आड भादंसंच्या 188 आनी जीपीडीपी कायदो कलम 3 खाला गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
