भांगरभूंय | प्रतिनिधी
भांगरभूंय । प्रतिनिधी
पोरणे गोंयः नेवरा खाजन कूळ असोसिएशनाच्या शेतकारांनी शुक्राराक आयोजीत केल्ली नेवरा खाजन बांदाच्चा स्लुईस गेटीची नेवरा पंचायत सभाघरांत आयोजीत केल्ली पावणी फुडें धुकलपाक लायलीं. पावणी करचे पयलीं असोसिएशनाक सगळो हिशेब सादर करपाक लावपाची मागणी शेतकारांनी करून पाणणी करपाक दिली ना.
स्लुईस गेटीची पावणी करपाक आमची कांय हरकत ना मात असोसिएशनाच्या वांगड्यांक पयलीं सगळो हिशेब दिवपाक जाय अशें पावणी फुडें धुकलपाची मागणी करपी एका शेतकारान सांगलें. शेतकारांचें जें कितें सांगणे आसा तें तांणी मामलेदाराक सादर करचें. गेटीची पावणी करपाक आपल्याक सांगलां आनी आपल्याक तें करचेंच पडटलें अशें तलाठी सत्यवान गावडेन शेतकारांक सांगलें.
हाचेर उपाय म्हणून शेतकारांनी पावणी करपाक दिली मात कोणेचे ल्हास लायली ना. नेवरा खाजन कूळ असोसिएशनाचे कार्यकारी समितीन पयलीं सगळो हिशेब सादर करपाक जाय. ते उपरांत पावणी करपाक जाय अशें चंद्रकांत मंगेशकारान सांगलें. पावणेंत ल्हास लावपा खातीर आयिल्ल्यानी पावणेंत वांटो घेनास्तना शेतकारांचे मागणेक तेंको दिलो अशी म्हायती जितू सावंत हाणे दिली. कूळ असोसिएसनाची सर्वसादारण बसका घेवन हिशेब सादर करपाक जाय अशें सांणी सांगलें.
पावणे वेळार बोवाळ जावपाची शक्यताय आशिल्ल्यान आगशी पुलीस स्टेशनांतले पुलीस पावणेचे सुवातेर व्हडा प्रमाणांत हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
