भांगरभूंय | प्रतिनिधी
भांगरभूंय । खबरां मेज
पणजीः कला अकादमीची 48वी ‘अ’ गट तियात्र सर्त फेब्रवारी/ मार्च म्हयन्यांत जातली. सर्ती खातीर प्रवेशिका नवे नेम आनी अटीं सयत 20 डिसेंबरच्यान पोरण्या सचिवालयांतल्या कला अकादमीच्या कार्यालयांत कार्यावळ आनी उदरगत विभागांत 20 डिसेंबर सावन कामाच्या वरांत मेळटल्यो. 30 डिसेंबर मेरेन सकाळीं 10 तें दनपारां 1 आनी दनपारां 2 तें 4 मगजती प्रवेशिका स्विकारतले.
सर्तींत वांटो घेवपाक पात्र आशिल्ल्या संस्थानी प्रवेशिकां वांगडा आपल्या रजिस्ट्रेशनाचें नूतनीकरण प्रमाणपत्र जोडचें पडटलें. 500 रुपये प्रवेश फी आनी 5 हजार रुपयांच्या सुरक्षा डिपॉझिट सयत प्रवेशिका 30 डिसेंबर मेरेन स्विकारतले. आयत्या वेळार सर्तींतल्यान फाटीं सरल्यार ङिपॉझिट म्हणून भरल्ली रक्कम मेळची ना. ते खातीर पांच दीस पयलीं सर्तींतल्यान फाटीं सररतां अशें कळोवपचें पडटलें.
सर्तीचो ड्रॉ 30 डिसेंबराक सांजेच्या 5 वरांचेर कला अकादमीच्या पोरण्या सचिवालयांतल्या पयले माळेर आशिल्ल्या कार्यालयांत काडटले. नेम वा अटींची पूर्तताय करनाशिल्लो प्रवेशिका स्विकारपाचो वा भायर मारपाचो अधिकार कला अकादमीन राखून दवोरला. कसलीय म्हायती जाय जाल्यार कला अकादमीच्या कार्यावळ आनी उदरगत विभागांत 2420452/53 ह्या फोन नंबरांचेर कामाच्या वेळांत संपर्क सादचो अशें कळीत केलां.
अ गट तियात्र सर्तींत वांटो घेवपाक फुडल्या संस्था पात्र आसात- सां बोर्तोलोमाय खेळ आनी सांस्कृतीक असोसिएशन- चोडण, गोवा व्हेल्या आर्ट अॅण्ड कल्चरल असोसिएशन, सेंट डॉमनीक ड्रामाटिक ट्रूप, मेरशी, माची मोगी, सान्ताक्रुज, कला मोगी, कांदोळी, दृश्टी एन्टरटेनमेंट, कुडचडें, मातियश क्रिएटिव्ह ग्रूप, कळंगूटे, माची मोगी मोरजी कल्चरल सांस्कृतीक संस्था, मोरजी, ताळगांव ड्रामाटिक ट्रूप, ताळगांव, आमी दायजी, फातोड्डे, मिनिनो जिजस कला असोसिएशन, चिंचणी, गोवन.कॉम सोशियो अॅण्ड कल्चरल असोसिएशन, कांदोळी, पाशेको ड्रामाटिक अॅण्ड कल्चरल असोसिएसन, कुडतरी आनी काला निकेतन, माजोर्डा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
