भांगरभूंय | प्रतिनिधी
मंत्री गोविंद गावडे: कला संगम 2022 कार्यावळींत विवीध कला केल्यो सादर
केपें : सतत सकारात्मक विचार करून प्रामाणिकपणान काम करीत रावल्यार मनशाची उदरगत जायत रावता, अशें मत कला आनी सांस्कृतीक मंत्री गोविंद गावडे हांणी उक्तायलें.
श्री कोकण पाईक सप्तकोटेश्वर कल्चरल ग्रुप किडमकरवाडो मोरपिर्ला हांगा आयोजीत कला संगम 2022 कार्यावळींत विवीध कला सादर केल्यो. हे कार्यावळीक मंत्री गोविंद गावडे उलयताले. ह्या वेळार आदले उपमुख्यमंत्री चंद्रकांत (बाबू) कंवळेंकार, आदले सरपंच खुशाली कुष्टा वेळीप, देवस्थान अध्यक्ष कांटू वेळीप, कलासंगमाचे अध्यक्ष शाणू वेळीप, सचीव आनंद वेळीप, राजू वेळीप, देविदास वेळीप आनी हेर मानेस्त हाजीर आशिल्ले.
आदले उपमुख्यमंत्री चंद्रकांत (बाबू) कंवळेंकार हांणी, आपल्याक उपमुख्यमंत्री म्हणून काम करपाक अडेज वर्सां मेळ्ळीं. ह्या काळांत डॉ. शामा प्रसाद मुखर्जी रूर्बन मिशन येवजणे खाला केंद्र आनी गोंय सरकाराच्या सहकार्यान फकत केपें ब्लॉकांत 30 कोटी रुपया खर्च करून विवीध कामां मंजूर करून घेतलीं. तीं टप्प्या टप्प्यान सुरू जातात. हातूंत स्टिलाचे बसस्टॉप, सोलर लॅम्प, व्यायाम शाळां खातीर उपकरणां, क्लब हाऊज आनी मैदानाचें नुतनीकरण, स्वयं सेवी गटांच्या सभाघराचें नुतनीकरण, शेतकार्यांक भाजी आनी फळां दवरपा खातीर थंड साठो, देवळा लागसारा शौचालय, उप भलायकी केंद्रां, रस्ते, अंगणवाडी शाळा, वाचनालयांचें नुतनीकरण आनी हायस्कुलांनी स्मार्ट क्लासरूमां खातीर विवीध उपकरणां दिल्ल्याची म्हायती तांणी दिली.
कार्यावळीचें सुत्रसंचलन रूपेश वेळीप हांणी केलें. सुरवातेक शाणू वेळीप हांणी येवकार आनी आनंद वेळीप हांणी उपकार मानले.
ह्या वेळार विवीध सर्ती घेतल्यो. हातूंत रांगोळी सर्तींत पयलें इनाम गौतम उदेकर, दुसरें दिव्या वेळीप आनी तिसरें इनाम रतीकक्षा वेळीप हांकां फावो जालें. चित्रकला सर्तींत पयलें इनाम रंगीशा वेळीप, दुसरें दिवानश वेळीप आनी तिसरें प्राची गांवकार हाका फावो जालें. फुलांची फाती घालपाचे सर्तींत पयलें मयुरी वेळीप, दुसरें शेवंती वेळीप आनी तिसरें शोभावती वेळीप हांकां फावो जालें. मल्लां विणपाचे सर्तींत पयलें इनाम भिवा वेळीप, दुसरें नीशा वेळीप आनी तिसरें सोनू वेळीप हांकां फावो जालें.
भेसवण सर्तीचें पयलें इनाम रूद्रज नायक, दुसरें समृद्धी वेळी आनी तिसरें दक्ष वेळीप. तशेंच फुगडी सर्तींत पयलें इनाम मल्लिकार्जून नागनाथ सांतेरी, मळकर्णे, दुसरें महालक्ष्मी सेल्फ हेल्प ग्रुप, बार्से आनी तिसरें के. डी. गर्ल, मोरपीर्ला हांकां फावो जालें. गरबा सर्तींत पयलें इनाम समसाखे सांगेकार, दुसरें युनिटी गरबा क्री, तिसरें इनाम जी 7 फ्रेंड्स स्पोर्टस अॅण्ड कल्चरल ग्रुप, मोरपिर्ला हांकां फावो जालें. एकोडे नाच सर्तींत पयलें इनाम जिवीका नायक, दुसरें लव्या नायक आनी तिसरें इनाम सर्वेद गांवकाराक मेळ्ळें. ग्रुप डान्स सर्तींत पयलें इनाम युवा धारबांदोडा, दुसरे इनाम श्वेता अॅण्ड ग्रुप, आवेडें आनी तिसरें इनाम शांतादुर्गा ग्रुप, सांगें हांकां फावो जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
