भांगरभूंय | प्रतिनिधी
नोव्हेंबर, डिसेंबर हे गोंयां खातीर जोडपाचे दीस. खास करून दर्यादेगांचेर, क्रूझ, कसिनोंचेर पर्यटकांची भिरींच्या भिरीं दिश्टी पडटात. गोंयचें पोट ताचेरुच चलता, देखून पर्यटन मळाचेर कितेंय जालें, पर्यटकांनी कितेंय केलें, जाल्यार अतिथी देवो भवः म्हणीत ताचे कडेन आडनदर करची पडटा. पूण कांय गजाली सोंसपा सारक्यो नासतात. तातूंतली एक म्हणल्यार आवाजाचें प्रदुशण!! रातीं 10 क आवाज कमी केलो जाल्यार पार्ट्यांचेर परिणाम जावं येता वा कोणाच्यो भावना दुखूं येतात, हे खातीर ही मुजत 12 मेरेन वाडोवपाची मागणी जाताली. काल सरकारान ती मानून घेतली. आतां फुडले 15 दीस रातीं 12 मेरेन राती आवाजान जागतल्यो. उपरांत कायद्यान परवानगी दिल्या, तितलो आवाज दवरचो पडटलो. अर्थांत हें जातलेंच हाची 100 टक्के खात्री कोण दिवपाक शकना. पर्यटकांनी मागणी केल्यार फांतोडे मेरेन व्हडलो आवाज चालू दवरचो पडटलो. कारण अतिथी हो देवा समान आसता.
रातीं 10 ते सकाळीं 6 मेरेन कायदो सांगता तितल्याच डेसिबल तांकीचो आवाज करपाक मेळटा. तसो कायदोच आसा. पूण तो चालीक लागनाशिल्लो. न्यायालयान नव्यान आदेश दिवन तो फक्त पाळपाक लायिल्लो. उपरांत गोंय सरकारान 10 वरां उपरांत आवाजाचेर मर्यादा येतली अशें जाहीर केल्लें. पूण फक्त थारावीक पार्ट्यां खातीर ही सक्ती केल्या, असो सूर थोड्यांनी काडिल्लो. कायदो भेदभाव करीना. आतां सरकारान अधिकृतपणान रातीं 12 मेरेन वेळ वाडोवन दिल्ल्यान सगलेच खूश आसतले. पूण 12 उपरांत कानांच्या पड्ड्यांच्यो तिस्त्यो वादऱ्यो करपी आवाज नासतलो, हाची खात्री कितें? फाटली पंद्रसभर पुलिसांनी 14 वयर पार्ट्यो बंद केल्यात. गुन्यांवूय दाखल केल्यात. तरीय फांतोड मेरेन बोवाळ आसता, अशें थळाव्यांचें म्हणणें. रातभर पर्यटक नाचतात, थंय तितल्या जाग्या पुरतें, तांकांच आयकूंक येता अशें संगीत वाजयल्यार कोण काय म्हणचो ना. पूण पयसुल्ल्या गांवांनीय तें स्पश्ट आयकूंक येता. हाचे वयल्यान आवाजाची पातळी कितली आसतली, हाची फक्त कल्पना करची. ल्हान भुरग्यांक, जाण्ट्यांक, सुकण्यांक, प्राण्यांक आवाजाचो कितलो त्रास जाता आसतलो, तें तांचें तांकां खबर! पयसो आसून कितें उपकारता, भलायकी सारकी आसपाक जाय, अशें म्हणटात. आवाजाक लागून 15 दीस रातभर झेम पडूंक ना, जाल्यार आरोग्य इबाडूं येता. व्हडल्या आवाजाचें समर्थन करप्यांनी हाचोय विचार करूंक जाय.
आतां 15 दीस पर्यटन नेटार आसतलें. सरकारान आवाजा विशीं नेम, मर्यादा घालून दिल्या, ती सगळेजाण पाळूया. पर्यटकां वांगडाच जाण्ट्या- नेण्ट्यांचो, मोनजातीचोय विचार करुया. खोशयेन, समाधानान नव्या वर्साक येवकार दिवया.
भायले भायर…..
आमच्या देशांत बेकायदेशीर गजाली चलतात, तितल्यो घडये खंय आसच्यो नात. संबंदीत अधिकाऱ्यांच्या, लोकप्रतिनिधींच्या बोल्सांत उडयले काय हांगा कितेंय करपाक मेळटा, असो समज सगल्याक पातळ्ळा आनी सरभोंवतणी नदर मारल्यार तातूंत तथ्य आसा, अशें अदींमदीं जाणवता. पुरावेय मेळटात. हालींसराक तर आॅनलायन पद्दतीचो वापर करून संवसारांतल्या खंयच्याय कोनशाक बसून कितेंय करपाक मेळटा. आनी नेमको हाचो गैरफायदो थोडे वेवसायिक घेवपाक लागल्यात. तातूंत नामनेच्यो कंपनीं, वेबसायटीय आसात, हाका कितें म्हणपाचें? दोन दिसां पयलीं पर्यटन खात्यान तीन वेबसायटींक नोटिशी धाडल्यात. मेक माय ट्रीप, गोवा व्हिलास फाॅर रेंट आनी लोहोनो ह्यो त्यो वेबसायटी. आॅनलायन ट्रेकिंग, माॅनिटरींग पंगडान त्यो बेकायदेशीर काम करतात, तें सोदून काडलें. कायद्या प्रमाण, गोंयांत आॅनलायन सेवा दिवपी आस्थापन, वेबसायटींनी पर्यटन खात्या कडेन नोंदणी करपाक जाय. मात हें जायना. लाखांनी रुपयांची उलाढाल करपी एजन्सींक हें सहज शक्य आसा. तरीय त्यो असो वेव्हार करतात. हाका लागून राज्य सरकाराची करोडांची येणावळ बुडटा. अश्यो आनीक कितल्यो वेवसायटी लिपचोरयां पर्यटकां कडेन अर्थीक वेव्हार करता आसतल्यो, तें कळपाक मार्ग ना. कोणेय येवचें आनी कितेंय करचें. आंगलट आयलें जाल्यार पयशे दिवन मिटोवचें, हे प्रकार हांगा वाडीक लागल्यात. नोव्हेंबरांत एका आदल्या क्रिकेटरान आपलो बंगलो भाड्यान दिवपाचो वेवसाय सुरू केल्लो, तें भायर सरिल्लें. सगल्या सिलेब्रिटींचे गोंयांतले बंगले तपासल्यार आनीकूय बऱ्योच गजाली उक्ताडार येवं येतात. गोंय हें संवसारीक नामनेचें पर्यटन थळ. तेन्ना आमच्या तपास यंत्रणांक रातदीस दोळ्यांत तेल घालून सादूर रावचें पडटलें. डिसेंबर म्हयन्यांत तर चडूच. कारण सरकारी यंत्रणेक काळखांत दवरून हांगा बरेंच कितें चालू आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
