भांगरभूंय | प्रतिनिधी
कतारांत चालू आशिल्ले संवसारीक फुटबॉल सर्तीचे दुसरे सेमी फायनलींत सध्याचो वस्ताद फ्रान्स पंगडान मोरोक्कोक 2-0 अशा गोल फरकांनी हारोवन सेगीत दुसरे आनी वट्ट चवथे खेपे फायनलींत सुवात मेळयली.
18 डिसेंबराक जावपी फायनलींत तो लियॉनॅल मॅसीच्या अर्जेंटिना आड खेळटलो. तिसरे सुवाते खातीर 17 डिसेंबराक क्रोएशिया आनी मोरोक्को ह्या पंगडां मदीं मॅच जातली.
ह्या जैता सयत फ्रान्सान एक मोठो विक्रम लेगीत आपल्या नांवार केलो. संवसारीक फुटबॉल सर्तीच्या इतिहासांत 60 वर्सांनी पयलेच खेपे सध्याचो वस्ताद सेगीत दुसरे खेपे फायनलींत पावला. ताचे आदीं हो पराक्रम ब्राझिलान केल्लो. 1958त ब्राझिलान संवसारीक वस्तादपण जोडल्या उपरांत 1962चे संवसारीक सर्तीचे फायनलींत पाविल्लो.
दुसरे वटेन फायनलींत पावपाचें मोरोक्कोचें सपन भंगलें. संवसारीक सर्तीचे सेमी फायनली मेरेन मजल मारपी मोरोक्को आफ्रिका खंडांतलो पयलो देश थारलो. पूण, ताका फायनलीची सुवात मेळोवपाक जमली ना.
मोरोक्को आड फ्रान्सान आक्रमक खेळ केलो. ताका लागून मॅचीच्या पांचव्याच मिनटाक थियो हर्नांडेजान गोल करून मोरोक्को खर धपको दिलो. ते उपरांत फ्रान्साच्या खेळगड्यांनी सातत्यान मोरोक्कोच्या गोलपोस्टाचेर हल्ले करीत रावले. पयल्या अर्दांत फ्रान्सान 1-0 अशी आघाडी घेतिल्ली. दुसऱ्या अर्दांत फ्रान्सान आनीक एक गोल केलो. हो गोल 79व्या मिनटाक रॅडल कोली मुआनीन केलो. तो बदली खेळगडो म्हूण मैदानांत देंविल्लो. ते उपरांत मोरोक्को पुनरागमन करपाची कसलीच संद फ्रान्सान दिवंक ना.
चार वर्सां पयलीं जाल्ले संवसारीक सर्तीचे फायनलींत फ्रान्सान क्रोएशियाक हारोवन वस्तादपण जोडिल्लें. ते पयलीं 1998त तो पयले खेपे वस्ताद जाल्लो. जाल्यार 2006त ताका उपवस्तादपणाचेर समाधान मानचें पडिल्लें. त्या वेळार ताका इटलीन हारयिल्लो. आतां तो तिसरे खेपे वस्तादपण जोडपाक इत्सूक आसतलो.
अंदूंचे सर्तींत मोरोक्कोन एक लेगीत गोल घेवंक नाशिल्लो. पूण, सेमी फायनलींत ताका दोन गोल घेवचे पडले आनी ताचें आव्हान सोंपलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
