भांगरभूंय | प्रतिनिधी
भांगरभूंय । प्रतिनिधी
पोरणे गोंयः सान्ताक्रुज पंचायत मंडळान दुकानदारांनी फुटपाथाचेर केल्लीं अतिक्रमणां आड मोहीम सुरू करून बिरेस्तारा सेंट फ्रान्सिस कॉलनींतले एका दुकानदाराचें अतिक्रमण काडलें. ह्या वेळार उपसरपंच डॉमनीक परेरा, पंच वांगडी आम्बेला गोम्स, परप्येचुवा डिसोझा आनी एल्सन ब्रागांझा, पंचायत सचीव महेश नायक आनी पोरणो गोंय पुलीस स्टेशनातले पुलीस हाजीर आशिल्ले.
दुकानदारांनी फूटपाथाचेर दवरिल्लें सामान, लोखणाची रॅकां पंचायत मंडळान कामगारा वरवीं काडलीं. एका दुकानदारान केल्ल्या अतिक्रमणाक लागून लोकांक आपलीं वाहना रस्त्याचेर पार्क करून दवोरची पडटालीं अशें उपसरपंच परेरा हांणे सांगलें. अतिक्रमणांक लागून येरादारीक आडमेळे येता अश्यो कागाळी येवपाक लागल्ल्यान आमी ती काडून उडोवपाचें काम केलें. दुकानदारांक तांणी केल्ली अतिक्रमणा काडून उडोवपा खातीर नोटिसो धाडिल्ल्यो. मात तांणी प्रतिसाद दिलो ना. देखून पंचायत मंडळाक कारवाय करची पडली अशें तांणे स्पश्ट केलें.
अतिक्रमणा आड आपूण 2016 सावन कागाळी करीत आयलां. मात पंचायत मंडळ काना-मनार घेनाशिल्लें. निमाणे तांका कारवाय करची पडली अशें आर्थूर डिसोझा हांणे सांगलें. अतिक्रमणा काडून उडयतना जप्त केल्ल्या सामानाची वळेरी तयार केल्या. ज्या दुकानदारांनी अतिक्रमणा केल्यांत ती काडून उडोवपा खातीर पंचायत मंडळान सात दिसांची मुजत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
