भांगरभूंय | प्रतिनिधी
भांगरभूंय । प्रतिनिधी
पणजीः सेरेनडिपिटी कला फावंडेशनाच्या 9 दिसांच्या सेरेनडिपिटी कला उत्सवाचें मुख्यमंत्री डॉ प्रमोद सावंत हांणी बिरेस्तारा उक्तावण केलें. व्हो आंतर विद्याशाखीय कला महोत्सव 23 डिसेंबर मेरेन चलतलो. महोत्सवाचें अंदूचें पांचवें वर्स आसा. पणजे आनी आशी-कुशीच्या चवदा परस चड सुवातानी महोत्सवाच्यो सुमार 120 कार्यावळी जातल्यो आनी तातूंत एक हजारा परस चड कलाकार वांटो घेतलो
उक्तावण कार्यावळीक सेरेनडिपिटी कला फावंडेशाचाचो संस्थापक आश्रयदातो सुनील कांत मुंजाळ हाजीर आशिल्ले. कोवीड म्हामारीक लागून फाटलीं दोन वर्सां बंद पडिल्लो सेरेनडिपिटी कला महोत्सव गोंयांत परत सुरू जाल्लो पळोवन आमकां खोस भोगता. महोत्सवांत कला कार्यावळींचो गोंयकार आस्वाद घेतले हातूंत दुबाव ना. गोंयांक आनी चड करून राजधानी पणजीक सांस्कृतीक केंद्र करपाक हो महोत्सव प्रेरणा दितलो अशें मुख्यमंत्र्यांनी महोत्ववाचें उक्तावण केल्या उपरांत सांगलें. गोंयांतल्या पर्यटनाक चालना दिवप ही सरकाराची जापसालदारी आसा. सेरेंनडिपिटी कला महोत्सवांतल्यान राज्यांत कला चऴवळीक चालना मेळटा अशें तांणी सांगलें.
पणजे शारांत हो महोत्सव घडोवन हाडपा खातीर गोंय सरकार, पणजी म्हानगरपालिका, कला आनी संस्कृती खातें, गोंय मनरिजवण सोसायटी, पर्यटन खातें, रानां खातें हांणी पालोव दिला. महोत्सवांत प्रदर्शना, खाणां, हस्तकला, भारतीय शास्त्रीय संगीत, फ्युजन, इंडी पॉप, रॉक आनी हेर तरेच्यो कार्यावळी जातल्यो. अंदूच्या महोत्सवांत आंतरविधा आनी प्रदर्शना, सादरीकरण, व्याख्याना, कार्यशाळा, भौशीक कला प्रकल्प आनी भुरग्यांचे कार्यावळींचेर आयोजकांनी चड भर दिला. विक्रम घोश, इशान नुरानी, सुदर्शन शेट्टी, वेणुगोपाळ सोळंकी, प्रमोद कुमार केजी, अंजना सोमय्य, पल्हाद सुखटणकार, मयुरी उपाध्ये, गीता चंद्रत आनी कुसार थाकोरे पदमसी ह्या कार्यावळींचें संयोजन करतले.
सेरेंनडिपिटी कला महोत्सवाच्या निमतान तीन वर्सां उपरांत परत गोंयांत येवपाक आमकां सगळ्यांक खोस जाता. महोत्सवाच्या आयोजना खातीर केल्ल्या सहकार्याक लागून आमी गोंय सरकाराचे उपकारी आसात. “ ह्या वर्सा आमी आंतरविधा हांकां वेगळ्याच पांवड्यार व्हरपाचोय यत्न करतात. प्रकल्पांचो दर्जो, विविध कला पद्दती आनी कले भितरल्या सृजनशील प्रयोगांचो प्रेक्षक आनी भेट दिवप्यां कडेन टिकपी छाप सोडटली अशी आस्त बाळगून आमी वेगवेगळ्या रुपांचो आनी आडमेळ्यांचो प्रयोग केला.” अशेंं सेरेनडिपिटी फावंडेशनाचो संस्थापक आनी आश्रयदातो सुनील कांत मुंजाळ हांणी सांगलें.
सेरेनडिपिटी कला आनी फावंडेशनाची संचालिका स्मृती राजघारिया हिचेंय ह्या वेळार भाशण जालें. सेरेंडिपिटी कला महोत्सवांत कांय खाशेल्या सुवातींनी आकर्शक प्रकल्प आसतले, जे इतिहासाची जाणविकाय, सैमीक सोबीतकाय वा कले कडेन आशिल्ल्या अंतर्गत संबंदा खातीर काळजीपूर्वक वेंचून काडल्यात. भारतांतल्या सगळ्यांत व्हडल्या बहुविधा कला कार्यावळीच्या आदल्या आवृत्त्यांनी बदल घडोवन हाडपाक आनी सध्याच्या परिस्थितींत कला कशी गरजेची आसा तें मुखार हाडपाक वचनबद्धताय घेतल्या अशें तिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
