भांगरभूंय | प्रतिनिधी
14 सावंड लेव्हल मिटर मागयल्यात; सरकाराची म्हायती
भांगरभूंय । प्रतिनिधी
पणजीः उत्तर गोंयांतल्या हणजूणें आनी पेडणें पुलीस स्टेशन वाठारांतल्यो 15 तल्यो 7 पार्ट्यो परवानगी नाशिल्ल्यान त्यो आयोजीत करपाक मनाय केल्या. जाल्यार परवानगी घेतिल्ल्यो सात पार्ट्यो रातच्या 10 परांत बंद करपाक लायल्यो. ते भायर पेडणें वाठारांत रातच्या 10 उपरांत पार्टी आयोजीत करून आवाजाचें प्रदुशण केल्ले खातीर आयोजकांचेर गुन्यांव दाखल करून यंत्रणा जप्त केली. ते भायर गोंयांत आवाजाचें प्रदुशण आडावचे खातीर 29 लाख 73 हजार 600 रुपया मोलाचे 14 सावंड लेव्हल मिटर मागयल्यात, अशी म्हायती सरकारान उच्च न्यायालयाच्या गोंय खंडपिठांत दिली.
ह्या प्रकरणांत सागरदीप शिरसयकार हांणी 2021 त वयल्या प्रकरणाचेर खंडपिठांत जनहीत याचिका दाखल केल्ली. तातूंत तांणी राज्य सरकार, उत्तर गोंय जिल्होधिकारी, म्हापशें जिल्होधिकारी, उत्तर गोंय पुलीस अधिक्षक, म्हापशें उपअधिक्षक, हणजूणें पुलीस निरिक्षक, गोंय पर्यटन खातें, हणजूणेंचे सरपंच आनी सचीव, अबकारी आयुक्त आनी सारिव्ह बीच शॅकाचो धनी एलायनो परेरा हांकां प्रतिवादी केल्ले.
हणजूणें दर्यादेगेर परवानगी नासतना लारिव्ह बीच क्लब रेव्ह पार्ट्यांचें आयोजन करतात. त्यो पार्ट्यो रातच्यो उसरां सुरू जावन फांतोडेर सोंपतात. ताका लागून वाठारांत व्हड प्रमाणांत आवाजाचें प्रदुशण जाता, असो मुद्दो शिरसयकार हांणी उपस्थीत केल्लो. ह्या मुद्द्या सयत आवाज प्रदुशण (नेम आनी नियंत्रण) कायदो 2000 तशेंच पर्यावरण संरक्षण कायदो आनी नेम हांची खर अंमलबजावणी करची, अशीय मागणी तांणी याचिकेंतल्यान केल्ली. हाची दखल घेवन खंडपिठान गोंयांत रातच्या 10 वरां उपरांत कसलेच तरेचे लावड स्पिकर यंत्रणा वापरपाचेर बंदी घालून संबंदीत कायदो आनी नेमांची खर अंमलबजावणी करपाचे निर्देश दिल्ले. ते भायर आर्नोल्ड डिसा हांणी गोंयांत नायट क्लब, बार अॅण्ड रॅस्टोरंण्ट, तशेंच वैयक्तीक पांवड्याचेर नागरीक मध्यानरातीर मेकळे सुवातेंत पार्ट्यो आयोजीत करतात, असो मुद्दो उपस्थीत केल्लो. ते खातीर खंयचेच यंत्रणेची परवानगी घेनाशिल्ल्याचो मुद्दो मांडून जनहीत याचिका दाखल केल्ली. हं संबंदांत फुडें कांयच जायनाशिल्ल्यान मूळ याचिकादार शिरसयकार हांचे सयत जिसा हांणी खंडपिठांत अवमान याचिका दाखल केल्या. ते भायर डिसा हांणी फाटले सुनावणेंत गोंयांत 19 ते 25 नोव्हेंबर ह्या काळांत मेकळे सुवातेंत रातच्या 10 उपरांत पार्ट्यो जाल्ल्यो, हाचे पुरावे खंडपिठांत सादर केले. हाची दखल घेवन खंडपिठान आवाजाचें प्रदुशण करप्यांचेर खर कारवाय करात, असो स्पश्ट निर्देश राज्य प्रदुशण नियंत्रण मंडळ, उपविभागीय न्यायदंडाधिकारी आनी उपविभागीय पुलीस अधिकारी हांकां दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
