भांगरभूंय | प्रतिनिधी
एमपीटीची 9 नंबर गेट आडायली; मामलेदार, पुलीस घडणुकेचे सुवातेर हाजीर
भांगरभूंय । प्रतिनिधी
मुरगांवः एमपीटी बंदरांतलो कोळसो आनी बॉक्सायड माला आड मुरगांवकारांनी वास्कोच्या मुरगांव बंदरांतल्या 9 नंबर गेटी मुखार आंदोलन केलें. बंदरांतलो कोळसो आनी बॉक्सायड माल मुरगांव- वास्कोच्या लोकांचे भलायकेक हानिकारक थारता, ह्या कारणा वयल्यान बंदरांतलो बॉक्सायड माल आंदोलन करप्यांनी 9 नंबराचे गेटी भायर वचपाकूच दिवंक ना.
आंदोलन करप्यां मदीं मुरगांव सडा वाठारांतले समाज वावुरपी शंकर पोळजी, सुरज चोडणकार, उमेश मांद्रेंकार, सचीन भगत, अवेश नायक, शेखर दाभोळकार, गौतम बोदाडे, प्रतीक पालेकार, मनोज मांद्रेंकार, शांताराम पराडकार आनी हेरांचो आस्पाव आशिल्लो. जाल्यार कायदो सुवेवस्थेचेर नियंत्रण दवरचे खातीर मुरगांव म्हालाचे मामलेदार रंजीत साळगांवकार, पुलीस उपअधिक्षक शेख सलीम, केंद्रीय उद्देगीक दळाचे जवान आनी पुलीस अधिकारी घडणुकेचे सुवातेचेर हाजीर राविल्ले.
आंदोलनकर्त्यांची समजूत काडटना पुलीस उपअधिक्षक शेख सलीम हांणी सांगलें, कोणेच कायदो हातांत घेवपाचो यत्न केल्यार ताचेर कारवाय करतले. तशेंच आंदोलनकर्त्यांनी आपली समस्या निवेदना वरवीं संबंदीत सरकारी विभागांत दिवप गरजेचें आसा. तशें करिनासतना कायदो हातांत घेवप प्रशासनाच्या विरोधांत आसा. जर एकाद्या ट्रकाक बंदरांतल्यान वतना लुकसाण जालें जाल्यार पुलिसां वतीन कारवाय करतले, अशी शिटकावणी पुलीस उपअधिक्षक सलीम हांणी दिली. पूण आंदोलनकर्ते 9 नंबराचे गेटी भायरूच राविल्ल्यान ट्रक बंदरांतल्यान भायर सरलेच ना. मुरगांव बंदरांतलो कोळसो, बॉक्सायड आनी हेर माल बंदराक जोडिल्ल्या राष्ट्रीय म्हामार्गा वरवीं आयात- निर्गत करचो. ते खातीर बंदरांतलो माल मुरगांव सडा मार्गान राष्ट्रीय म्हामार्गा वयल्यान व्हरप गरजेचो आसा. पूण बंदरांतलो माल वास्को शारांतल्यान व्हरतात ताका लागून शारांत अपघाताची समस्या निर्माण जाता. तशेंच पुराय शाराक प्रदुशणाक फुडो करचो पडटा, सुरज (बालन) चोडणकार, शंकर पोळजी, उमेश मांद्रेंकार आनी हेरांनी सांगलें.
राष्ट्रीय म्हामार्गाचो वापर करचोः साळकार
बंदरांतलो कोळसो, बॉक्सायड आनी हेर सगळो माल नव्यान केल्ल्या राष्ट्रीय म्हामार्गा वयल्यान व्हरचो अशें आपणें एमपीटीक आदींच सांगलां. शारांतले रस्तो अवजड येरादारी खातीर फावोशे नात. तशेंच वाडट्या अपघातांत लागून बंदरांतले माल व्हरपी ट्रक राष्ट्रीय म्हामार्गा वयल्यान घुंवडावप गरजेचें आसा. हे संबंदांत मुख्यमंत्र्यां कडेन आपलें उलोवणें जालां, अशी म्हायती वास्कोचे आमदार कृष्णा साळकार हांणी दिली.
आंदोलनाक आमदारांनी तेंको दिवचोः शंकर पोळजी
कोळसो प्रदुशणा आड आमी खूबशीं आंदोलनां केलीं, पूण एमपीटी, अदामी ग्रूप, गोवा प्रदुशण नियंत्रण मंडळ हांणी आमची मातूय दखल घेवंक ना. उरफाटे प्रदुशणांत आनीक वाड करून मुरगांवांतल्या सडा, बोगदा, जेटी, वास्को वाठारांतल्या लोकांक मरणाच्या दारांत पावयल्यात. कोळशाची येरादारी करपी ट्रक वास्को शारांतल्यान वतात. ताका लागून पुराय वाठाराक प्रदुशणाक फुडो करचो पडटा. हे खातीर वास्कोचे आमदार कृष्णा साळकार आनी मुरगांवचे आमदार संकल्प आमोणकार हांणी आमच्या आंदोलनाक तेंको दिवचो, अशी मागणी शंकर पोळजी हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
