भांगरभूंय | प्रतिनिधी
काणकोणां एक्सप्रेस रेल्वेंक स्टॉप दिवपाची मागणी; 5 जानेवारी मेरेन मुजत
भांगरभूंय । प्रतिनिधी
काणकोणः कोंकण रेल्वे स्टेशनाचेर नेत्रावती, एर्नाकुलम केरळ, मुंबय ह्या एक्सप्रेस रेल्वेंक काणकोणां स्टॉप दिवंक नाशिल्ल्यान काणकोणकारांनी 15 डिसेंबराक काणकोणच्या कोंकण रेल्वे स्टेशनाचेर मोर्चो व्हेलो.
ह्या मोर्चांत सुमार 200 नागरिकांनी वांटो घेतिल्लो. ह्या मोर्चाचें फुडारपण काँग्रेस पक्षाचे जनार्दन भंडारी, गोंवा फॉरवर्ड पक्षाचे विकास भगत हांणी केलें.
काणकोणच्या कोंकण रेल्वे स्टेशनाचेर नेत्रावती, एर्नाकुलम केरळ, मुंबय ह्या जलदगती रेल्वेंक स्टॉप दिवचो, अशी मागणी करपी निवेदन काणकोणच्या ज्येश्ठ नागरीक मंच, व्हिजन मिशन प्रॉग्रेसिव्ह काणकोण आनी काँग्रेस परिवारान गोंयच्या राजकी फुडऱ्यांक तशेंच कोंकण रेल्वेच्या संबंदीत मुख्य अधिकाऱ्यांक दिल्लें. ह्या स्टेशनाचेर वयल्या रेल्वेंक स्र दिलो ना जाल्यार रेल्वे स्टेशनाचेर मोर्चो व्हरपाची शिटकावणी लेगीत दिल्ली.
मोर्चा वेळार रेल्वेचे अधिकारी सुनील नाडकार हांणी मोर्चेकारां वांगडा चर्चा केली. रेल्वे मंडळाक काणकोणच्या लोकांच्यो भावना कळयतले, अशें तांणी सांगलें.
5 जानवारी मेरेन एक्सप्रेस रेल्वे काणकोण स्टेशनाचेर रावल्यो नात जाल्यार खर आंदोलन करतले, अशी शिटकावणी मोर्चेकारांनी दिली. ह्या वेळार मंचाचे पदाधिकारी कमलाकर म्हाळशी, उल्हास पै भाटीकार, दिलखुश शेट, झुलो शेट, अनील भगत, उल्हास देसाय, संतोष नायक गांवकार, प्रशांत देसाय, शंकर नायक, वैष्णव पेडणेंकार, अजय पागी, नगरसेवक धीरज नायक गांवकार, रत्नाकर काणकोणकार, अरुणा शेट आनी हेर मानेस्त हाजीर आशिल्ले.
‘2024’ चो विचार करचो पडटलोः भाटीकार
फ्रांसीस सार्दिन, विनय तेंडुलकार हे दोन खासदार तशेंच श्रीपाद नायक हे केंद्रांत मंत्री आसात. तरी लेगीत एक्सप्रेस रेल्वे काणकोणां रावानात ही लजेची गजाल. एक्सप्रेस रेल्वे धरचे खातीर काणकोणच्या लोकांक हजारांनी रुपया खर्च करून मडगांवां नाजाल्यार कारवारा वच्चें पडटा, 2024 चे वेंचणुकेंत विचार करपा सारकी ही गजाल, अशें मुख्याध्यापक पुरस्कार फावो जाल्ले निवृत्त शिक्षक उल्हास पै भाटीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
