भांगरभूंय | प्रतिनिधी
नांवांत कितें आसा? अशें कोणूय म्हणूं, पूण सगळें कितें नांवांतूच आसता. म्हणून तर दर एकलो नांवां खातीर पिसो जाल्लो आसता.
कोणाक बोर्डार नांव जाय आसता, कोणाक प्रकल्पाक नांव मेळचें शें दिसता, कोणाक उद्घाटनाच्या तकट्यार नांव जाय आसता. निमाणें सगळें तर नांवां खातीरुच आसता. तातूंत आमी गोंयकार पळे नांवां दवरतात, ताका संवसारांत तोड ना काय दिसता. आमकां गोंयकारांक तर नांवां दवरूंक कोणूच हारोवंक शकना. आमी फळांक मनशांचीं आनी मनशांक फळांचीं नांवां दवरपी लोक. आमच्या आंब्यांची नांवां पळेयात. कुलास, आन्फोंस, शावियेर आनी मनशांचीं नांवां, आंबो, कांदो, कोंडो आनी बोंडो.
तातूंत बर्या नांवांची कशी वाट लावची हें आमचेच कडल्यान शिकचें. पांडुरंगाचो पांडू, नामदेवाचो नामो, तुकारामाचो तुको तर मनोहराचो मोनू. बायलांय हे बाबतींत फाटीं नात आं. ताणींय गोदावरीचें गोदू आनी नर्मदेचें नमू करून उडयलां. ते भायर आमच्यांत आशिल्ल्या व्यंगाचेरूय नांवां आसात. कुड्डो, सातको, भेरो. हांचीं खरीं नांवां सांगल्यार तांकां कोण वळखुचो ना. दुसरो कित्याक ताका स्वताकूच एकेकदां आपणालें खरें नांव याद उरना, हाचे वयल्यान पळेयात.
आमकां जशीं नांवां आसात तशीं आमच्या घराकूय नांवां घाल्लीं आसतात. कोण आवयचें तर कोण बापायचें नांव दवरतात. जाणीं जिते आसतना आवय- बापायक मानलेच ना वा तांकां पळेलेच ना तेय असलीं नांवां दवरतात. जिती आसतना आवयक रडोवपी तिचे उपरांत घराक नांव घालता ‘आईचा वा आईबाबांचा आशिर्वाद.’ कांय जाण देवाचें जाल्यार थोडे स्वामीचेंय नांव दितात. आपल्या घराचें नाव कोणाकूय सांगताना तरी त्या निमतान देव वा स्वामीच्या नांवांचो जप जाता. अशेंच एकल्यान घर बांदलें आनी नांव घालें ‘इंदिराकांत’. पर्तगाळ मठाचे आदले स्वामी. मठाचे अनुयायी सुखावले. पूण, आमचे कडेन संशोधक उणे नात. कांय दिसांनी कोणेतरी सोद लायलो, ताणें स्वताचेंच नांव घराक दवरलां. सोद लावपीय बरोच शाणो आसलो. ताचे मतान नांव घालप्याच्या घरकान्नीचें नांव आसलें इंदिरा. तिचो कांत म्हणल्यार तिचो घरकार, जो ह्या घराचो मालक. म्हणजे ताणें ‘घुमा फिराके’ म्हणटात तशें स्वताचेंच नांव घराक दिल्लें. पळेयात गोंयकारांची तकली. आसा कोण हात धरपी?
आतां ही दुसरी गजाल. कांय वर्सां फाटीं गोंय सरकारान शाळां खातीर बाल रथ येवजण सुरू केली. दर एके शाळेक भुरग्यांक हाड- व्हड करचे खातीर बसी दिल्यो. तेन्ना काँग्रेसीचें सरकार. काँग्रेसीचे राजवटींत कसलोय प्रकल्प सुरू करतले जाल्यार गांधी वा नेहरू हीं दोनूच नांवां आसलीं. गांधी रोड, नेहरू स्टेडियम, इंदिरा गांधी एअरपोर्ट आनी राजीव गांधी कला मंदिर. हीं नांवां सोडलीं तर देशांत आनीक नांव मेळ नासलें. आतां सगळेच दीन आनी दयाळ.
तर ह्या बाल रथ येवजणेकूय नांव मेळ्ळें ‘इंदिरा बाल रथ’. हांगा गांधी शेणिल्लें. नाव मात्शें हटके म्हणटकूच वाचुंकूय बरें दिसतालें. आतां हें नांव आयलें म्हणून कोणे विरोध बी केलोना. पद्दतूच ती आसली न्ही. तांचींच नांवां येवपाचीं. पूण हें नांव येतकूच मात कोणाक तरी येवजलें, ज्या मंत्र्यान हें नांव सुचयलां ताचे आवयचें नांव इंदिरा. ताणें आपलेच आवयचें नांव हे येवजणेक दिलां. आनी देखून ‘इंदिरा गांधी बालरथ’ म्हणी नासतना ‘इंदिरा बालरथ’ म्हणलां. तेवटेन इंदिरेचें नांव म्हणून सरकार खूश आनी हेवटेन घरचीं खूश. हाकाच लागून नांव दवरूंक आमीच फिशाल काय दिसतालें…..
…. आनी हेच खातीर नव्या विमानतळाक खंयचें नांव घालचें हाचेर आमचो वाद चलतालो. दर एकल्याक दिसतालें नांव दवरूंक हांवूच हुशार. तातूंत सरकाराच्या दर एके बर्या- वायट करणेक नांवां दवरपी मुखार आसले. तांकां दिशिल्लें सरकार आमचेंच आयकतलें, न्ही आमी आयकूंक भाग पाडटले. आमी नाल्ल पाडटले आयकल्लें, आतां भाग पाडटले आयकतात. आसूं. तर कोण म्हणटालो विमानतळाक पयल्या मुख्यमंत्र्याचें नांव दियात तर कोण म्हणटाले आदल्या मुख्यमंत्र्याचें नांव दियात.
पयलो मुख्यमंत्री गोंय महाराष्ट्रांत घालूंक सोदतालो. तो गोंय बोल्सांत घालुनूच भोंवतालो. पूण, बाबडो वेंताक चुकलो. दुसरो प्रधानमंत्री जावपाचो, पूण लोणच्यान मुरलो आनी चेपणाक पडलो. दोगांयचें सपन भंगलें. एकल्याक मुंबय चुकली जाल्यार दुसर्याक दिल्ली. पूण, विमानतळाक दोन नांवां कशीं दिवप हो एक प्रश्न आसलोच.
एकल्यान सुचयलें विमान वयर वतना एक आनी सकयल देंवतना दुसरें नांव दिवंक मेळटा तर पळोवचें. अप अँड डावन. मागीर कोणें म्हणलें, तशें जाल्यार विमान वयर पावलें म्हणजे हाऊचें नांव दिवचें. भाई, भाऊ आनी हाऊ. गोंयांत नाय जाल्यार पयलीं दोन भाऊ आनी एका हाऊचें राजकारण चलतालें, अशें आमचे जाणटेले सांगताले. कोणेय कितेंय सुचोवं निमाणें नांव दिल्लीश्वरान थारावपाचें. आमी फकत थाराव घेवपाचे. आनी दिल्लीश्वरान खिणांत प्रश्न सोडयलो. सगळ्यांक खोशी करून सोडले. सद्याक कितलेशेच जाण कॉलर तायट करून भोंवतना दिसतात. विचारल्यार ‘पळेलें, म्हजें वयर कितलें बरेपण तें?’ म्हणून सांगतात. आतां पायलट सांगतलो. ‘कांय वेळान विमान मनोहर आंतरराष्ट्रीय विमानतळाचेर देंवतलें’. पर्यटक विमानतळ पळेतले आनी म्हणटले, ‘सुंदर बांदला विमानतळ. आनी नांवूय सार्थ दवरलां -मनोहर.’ नांव कसलेंय घालें म्हणून कोण हांकां वळखतले? चारूच दिसांची वळख ती. दाबोळे विमानतळाकूय एक नांव आसा. कोणाक खबर तरी आसा? देखून मनोहर, सुंदर, विलोभनीय हेंच नांव सारकें सोबतलें. नांव दवरतल्याक मानपाचो. आनी एक, आयच्यान हांव तरी नांवां दवरूंक आमीच फिशाल म्हणचो ना.
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
