सुयश प्रभुदेसायाचो दोट्टी शेंकडो

भांगरभूंय | प्रतिनिधी

राजस्थाना आड चालू आशिल्ले रणजी करंड सर्तीच्य एलीट सी गटांतले मॅचींत येजमान गोंयान आपली स्थिती घटमूट केली. ताणें 8 विकेटी वगडावन 493 धांवड्यो केल्यात. पर्वरीच्या जीसीए अकादमी मैदानाचेर मॅच आयोजीत केल्या. दुसऱ्या दिसाच्या खेळाचें आकर्शण म्हणल्यार सुयश प्रभुदेसायाचो दोट्टी शेंकडो आनी अर्जुन तेंडुलकरान पदार्पणाचे मॅचींत नोंदयिल्लो शेंकडो.

सुयशान 212 धांवड्यांची खेळी केली, जाल्यार अर्जुन तेंडुलकरान 120 धांवड्यांचें योगदान दिलें.

ते पयलीं गोंयान 5 बाद 210 धांवड्यां वयल्यान मुखार खेळपाक सुरवात केली. पयल्या सत्रांत ताणें एकूय विकेट वगडायनासतना 43 धांवड्यांची भर घाली. हे मजगतीं, सुयशान आपलो शेंकडो पुर्ण केलो. अर्जुन तेंडुलकरान ताका योग्य साथ दितना आपलो अर्द शेंकडो पुर्ण केलो.

जेवणाच्या विसवा मेरेन गोंयान 5 बाद 320 धांवड्यो केल्यो. जेवणाच्या विसवा खातीर खेळ थांबलो त्या वेळार सुयश 128 आनी अर्जुन 67 धांवड्यांचेर आशिल्लो.

दुसऱ्या सत्रांत लेगीत राजस्थानाक विकेट मेळोवंक दिवंक ना. दुसऱ्या सत्रांत सुयशान आपल्यो दिडशें धांवड्यो पुर्ण केल्यो. जाल्यार अर्जुनान आक्रमक बॅटींग करतना 178 बॉलांनी शेंकडो पुर्ण केलो. हातूंत 12 चवके आनी दोन सक्यांचो आस्पाव आशिल्लो. च्या च्या विसवा खातीर खेळ थांबलो त्या वेळार सुयश 172 आनी अर्जुन 112चेर खेळटालो.

च्या च्या विसवा उपरांत खेळ परतून सुरू जालो आनी अर्जुनान आपल्या खात्यांत आनीक आठ धांवड्यांची भर घालून 120चेर बाद जालो. तो बाद जालो त्या वेळार गोंयान 422 धांवड्यां मेरेन मजल मारिल्ली.

अर्जुन बाद जाल्या उपरांत मुखेली दर्शन मिशाळान सुयशाक बरी साथ दिली. दोगांयनी सातवे विकेटी खातीर 71 धांवड्यांची भागिदारी केली. हे मजगतीं, सुयशान आपलो दोट्टी शेंकडो पुर्ण केलो. ताचे हे खेळींत 29 चवक्यांचो आस्पाव आशिल्लो. अखेरेक वैयक्तीक 212 धांवड्यांचेर तो बाद जालो. सुयश बाद जाल्या उपरांत दर्शन मिशाळ (33) रोखडोच बाद जालो.

दुसऱ्या दिसाचो खेळ सोंपलो त्या वेळार मोहित रेडकार आनी लक्ष्य गर्ग खेळपट्टीचेर आशिल्ले.

राजस्थाना वतीन अनिकेत चौधरी, कमलेश नागरकोटी, अराफत खान, मानव सुथार हांणी दरेकी 2 विकेटी घेतल्यो.