भांगरभूंय | प्रतिनिधी
केरी- सत्तरीः साहस अकादमी गोंयची 31 वी दीपाजी राणे राष्ट्रीय पांयभोंवडी मोहीम 26 ते 30 डिसेंबर मेरेन जातली. खेळां आनी युवा वेव्हार खात्याच्या पालवान ठाणे वाळपय सत्तरीच्या सह्याद्रीच्या पर्वत रांकांनी हें पांच दिसांचें राबितो साहसी शिबीर आयोजीत केलां. हाची पुराय कार्यावळ आयोजकांनी जाहीर केलां. हे संस्थेक 2004 चो खेळां आनी युवा वेव्हार खात्याचो उत्कृश्ठ संस्था पुरस्कार फावो जाला.
1989 सावन हें शिबीर सुरू जाल्लें. कोरोना म्हामारीक लागून दोन वर्सां तें जावंक नाशिल्लें. विद्यार्थ्यांक सैम, धिटाय आनी वाठाराचो अभ्यास जावचो हे खातीर हें शिबीर आयोजीत करतात. तातूंत विद्यार्थ्यांक प्रशिक्षकां वतीन साहसी वावर शिकयतात. तशेंच सोरपांचें दर्शन आनी पर्यावरणाचेर व्याख्यानां दितात. चड करून फ्लोरा आनी फावन हांचे विशीं म्हायती दिवन तांचे मदीं सैमा विशीं आवड निर्माण करतात.
हें शिबीर सगळ्या विद्यार्थ्यां खातीर, शिक्षणीक संस्थां खातीर, तरणाट्यां खातीर तशेंच कुटुंबा खातीर उक्तें आसा. शिबिरा खातीर येवप्यांनी शिबिराचे सुवातेचेर येवपाचो आनी परतून घरा वचपाचो खर्च स्वता करचो पडटलो. हायस्कुला वतीन वांटो घेवपी विद्यार्थ्यां खातीर प्रवेश शुल्क 1200 रुपया, उच्च माध्यमीक आनी म्हाविद्यालयांच्या विद्यार्थ्यां खातीर 2 हजार जाल्यार हेर लोकांक 2500 रुपया शुल्क दवरलां.
प्रवेश अर्ज सांखळे विनोद पांगम (9421248649) हांचे कडेन मेळटात. 22 डिसेंबर मेरेन ते भरचे.
सोमारा 26 डिसेंबराक दनपारां 2.30 वरांचेर ठाणे सत्तरी पंचायत मैदाना कडेन एकठांय जावन नोंदणी करतले. सांजेच्या 6.30 वरांचेर शिबिराचें उक्तावण जातलें. ते उपरांत सांस्कृतीक कार्यावळ जातली. 27 डिसेंबराक सकाळीं हिवरे घसघशाचेर पांयभोंवडी, सांजेच्या 7 वरांचेर खेळ आनी मनरिजवणेच्यो कार्यावळी जातल्यो. 28 डिसेंबराक सकाळीं चरावणें दोंगराचेर पांयभोंवडी, सांजेच्या 7 वरांचेर रान संपदा आनी पर्यावरणाचेर आदारीत कार्यावळ जातली. 29 डिसेंबराक सकाळीं जांबळी कडेन चोर्ला घांटांत पांयभोंवडी, सांजेच्या 7 वरांचेर समारोपाची कार्यावळ जातली. तातूंत शिबिरार्थींत प्रमाणपत्रां आनी यादस्तीक चिन्नां दितले. ते उपरांत सांस्कृतीक कार्यावळ जातली. 30 डिसेंबराक च्या आनी नास्तो केले उपरांत घरा वचपाक भायर सरतले.
शिबिराक मुख्य आश्रयदाते आदले मुख्यमंत्री प्रतापसिंह राणे, मुख्यमंत्री डॉ. प्रमोद सावंत, पर्येची आमदार तशेंच रान म्हामंडळाची अध्यक्ष डॉ. दिव्या राणे, खेळां आनी युवा वेव्हार खात्याचे संचालक रोहीत कदम, जेनिफर गोन्साल्वीस, नेहरू स्टेडियम फातोड्डेंचे वेवस्थापक लक्ष्मीकांत मंगेशकार, साहस अकादमीचे संस्थापक अध्यक्ष विजय कुमार वेरेंकार हाजीर रावतले. शिबिरांत वांटो घेवचे खातीर मिथुन नायक (9823709264, 9423062492) वा देवेंद्र गुरव (9422445538) हांचे कडेन संपर्क करचो, अशें आयोजकांनी कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
