भांगरभूंय | प्रतिनिधी
भांगरभूंय । प्रतिनिधी
पणजीः एके बायलेन दाखल केल्ल्या गुन्यांवा संबंदी निवृत्त न्यायाधीशा वतीन समितीची थापणूक करून चवकशी करपाची मागणी करपी याचिका मुरगांवचो आमदार संकल्प आमोणकार हाणे मुंबय उच्च न्यायालयाच्या गोंय खंडपिठांत दाखल केल्ली. ही याचिका फाटल्यान घेवपाची मागणी करपी अर्ज तांणी मंगळाराक खंडपिठांत केल्लो. मात ह्या प्रकरणात राजकी फायद्या खातीर न्यायालयाचो वा कायद्याचो गैरवापर करपाक दिवचे नात अशें निरीक्षण नोद करून खंडपिठान मूळ याचिका फाटीं घेवपाक न्हयकार दिलो.
डॉ प्रमोद सावंत सरकारांतलो एक मंत्री एके बायलेचेर केल्ल्या लिंगीक अत्याचारांत वांटेकार आसात असो आरोप फाटल्या वर्सा तेन्नाचो प्रदेश काँग्रेस अध्यक्ष गिरीश चोडणकार हांणी केल्लो. ते उपरांत संबंदीत बायलेन बिहारांत मुफ्फसील पुलीस स्टेशनांत संकल्प आमोणकार हाण आनी हेर पांच जाणांनी व्हिडिओ तयार करपा खातीर आपले कडेन 10 लाख रुपयांची डील केल्ली असो आरोप संबंदीत बायलेन कागाळेंत केल्लो. संबंदीत मंत्र्यान आपलो लिंगीक छळणूक केली ना उरफाटें आपल्याक मजत केल्ल्याचो दावो तिणे केल्लो. हे कागाळेची नोंद घेवन बिहार पुलिसांनी संकल्प आमोणकार हाचे सयत हेरां आड झिरो एफआरआय नोंद करून ती वाल्को पुलीस स्टेशनांत वर्ग केल्ली.
हे उपरांत संकल्प आमोणकारान आदलो मंत्री मिलिंद नायक हाचे आक्षेपार्ह फोटे, नायक आनी ते बायलेन एकमेकांक धाडिल्ले व्हॉट्सअॅप संदेश, दोगांय मदलें उलोवणे आनी ते बायलेचो ऑडिओ जाहीर केल्लो. ह्या प्रकाराक लागून मिलिंद नायक हाका आपल्या मंत्रिपदाचो राजिनामो दिवचो पडिल्लो. संकल्प आमोणकारान मिलिंद नायक हाचे आड बायल पुलीस स्टेशनांत कागाळ नोंद करून मोबायल ताचे सुवादीन केल्लो. संबंदीत बायलेन वास्को उपविभागीय पुलीस अधिकाऱ्याक अर्ज करून संकल्प आमोणकारान केल्ले सगळे आरोप फटीचे अशें सांगिल्ल्यान पुलिसांनी आमोणकार हाणे केल्ली कागाळ भायर मारिल्ली. बायलेन संकल्प आमोणकार आनी हेरां आड केल्ली कागाळ वास्को पुलिसांनी गुन्यांव फाट्यांत वर्ग केल्ली.
ह्या लिंगीक अत्याचार प्रकरणाची निश्पक्ष चवकशी करपा खातीर आमोणकार हांमी खंडपिठान याचिका सादर करून निवृत्त न्यायाधिशाचे येजमानके खाला चवकशी समिती स्थापन करपाची मागणी केल्ली. बदलिल्ल्या राजकी परिस्थितींत ही याचिका फाटीं घेवपाची मागणी करपी अर्ज मंगळाराक जाल्ले सुनावणे वेळार आमोणकार हांणे खंडपिठाक सादर केल्लो. मात तांणी तो भायर मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
