भांगरभूंय | प्रतिनिधी
भांगरभूंय । प्रतिनिधी
म्हापशेंः खोर्जुवें- सिकेरी मजगतीं आशिल्ल्या लोखणाच्या फुटब्रिजाचे सुवातेर काँक्रिटाचो नवो पूल बांदपाचो प्रस्ताव सरकाराक सादर करपाचें मयेचो आमदार प्रेमेंद्र शेट आनी हळदोण्याचो आमदार अॅड कार्लुस फेरेरा हांणी थारायलां. तांणी मंगळाराक सकाळी फूटब्रिजाची पळोवणी केली. तांच्या वांगडा सिकेरीचो पंच वांगडी कृष्णा चोडणकार आनी बांदकाम खात्याचो सहाय्यक अभियंतो देसाय आनी मयूर गांवकार आशिल्ले.
सध्याच्या फूटब्रिजाची सिकेरी आनी खोर्जुव्यांतले शेतकार तशेंच शाळेंत वचपी भुरगीं वापर करतात. सद्या ह्या वाठारांतली येरादारी बरीच वाडल्या. ताक लागून फुटब्रिजाचे सुवातेर काँक्रिटाचो नवो पूल बांदपाची लोकांची मागणी आसा. सध्याच्या पुलाचे सुवातेर वा लागीं कमी अंतर आशिल्ले सुवातेर व पूल बांदपाची येवजण आसा. दोनूय सुवातेर पूल बांदपाक येवपी खर्चाचो अदमास तयार करून तो प्रस्ताव सरकारा सामकार दवोरतले अशें आमदार शेट हांणी सांगलें.
सिकेरी- खोर्जुवें मजगतीं नवो पूल बांदपाची गरज आसा. आमदार प्रेमेंद्र शेट हांणी ते खातीर यत्न सुरू केल्यात. सरकारान प्रस्ताव मानून घेतल्यार एक ना जाल्यार दोन पूल उबे रावपाक शकतात अशें आमदार फेरेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
