भांगरभूंय | प्रतिनिधी
भांगरभूंय । प्रतिनिधी
पणजीः ज्येश्ठ पत्रकार गुरुदास रावजी सिंगबाळ (83) हें थोड्या तेपाच्या दुयेसान मंगळारा सकाळीं संवसाराक अंतरले. दनपारां सान्तइनेज मसंडभुयेंत तांचे कुडीचेर निमणे संस्कार केले. पर्वरी पत्रकार कॉलनींतल्या तांच्या घरा वचून सगळ्या मळा वयल्या लोकांनी तांचें निमणे दर्शन घेतलें. तांच्या फाटलायन चलो आनी लग्न जाल्ली चली असो घराबो आसा. तांच्या मरणाक लागून गोंय श्रमीक पत्रकार संघटने (गुज) सयत हेर संस्था, संघटनांनी दुख्ख उक्तायलां.
नवहिंद टायम्स ह्या इंग्लिश दिसाळ्यांतल्यान 1964 वर्सा तांणी आपले पत्रकारितेक सुरवात केल्ली. थंय प्रतिनिधी आनी मुख्य प्रतिनिथी म्हणून वट्ट 13 वर्सा काम केल्या उपरांत मडगांवच्यान सुरू केल्ल्या वेस्ट कोस्ट टायम्स दिसाळ्याचे पणजी ब्युरो मुखेली, उपरांत इंडियन एक्स्प्रेस ह्या राष्ट्रीय दिसाळ्यांत तांणी गोंय ब्युरो मुखेली म्हणून काम केल्लें. द गोवन विकली ह्या सातोळ्यांत लेगीत तांणी थोडी वर्सां काम केल्लें. बंगळुरूच्या डेक्कन हेराल्ड दिसाळ्यांत ते फ्रीलान्सर म्हणून तांणी काम केल्लें.
गोंय श्रमीक पत्रकार संघटनेचे (गुज) ते संस्थापक वांगडी आशिल्ले उपरांत ते तिचे अध्यक्ष जाल्ले. पत्रकार आनी तांचे बऱें मागपी तांका काका ह्या नावान पाचारताले. गोंय मुक्ती उपरांत जाल्ल्या राजकी, सामाजीक, शिक्षणीक घडणुकाचें ते साक्षीदार आशिल्ले. पत्रकारितेंत केल्ल्या वावरा खातीर तांका गोवा कला अकादमीचो उत्कृश्ट पत्रकारिता पुरस्कार, राज्य आरएसएसाचो नारद पुरस्कार, गोंय चेंबर ऑफ कॉमर्साचो ब्रिलियंट अचिव्हमेंट पुरस्कार आनी 2021 वर्सा गोंय सरकाराचो टीबी कुन्हा जिणे गौरव पुरस्कार फावो जाल्लो. पत्रकारितेंतल्यान निवृत्त जाल्या उपरांत मुश्टीफंड इन्स्टिट्यूट ऑफ मास कम्युनिकेशनांत तांणी विद्यार्थ्यांक स वर्सां पत्रकारिता विशय़ाचें शिक्षण दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
