गुळेली विद्यालयाचो किलबील उपक्रम उमेदीन

भांगरभूंय | प्रतिनिधी

11 शाळांनी घेतलो वांटो: मास्टर किलबील श्लोक गावडे, मीस किलबील प्राप्ती भट

वाळपय: सरकारी माध्यमीक विद्यालय गुळेली आयोजीत केल्ल्या मनरिजवणेचेर आदारून किलबील मुळाव्या विद्यालयाचो वांटो आशिल्लो दोन दिसांचो उपक्रम हालींच उमेदीन जालो. 

नकनू इंडस्ट्रीज पदाधिकारी श्री गोविंद प्रभू हांणी दिल्ले श्री सरस्वती मातेच्या मुर्तीची स्थापना मुखेल सोयरे नगरगांव जिल्हो परिशद वांगडी राजश्री काळे हांचे हस्तुकीं जाली. उपरांत कार्यावळीच्या उक्तावण सुवाळ्याक मुखेल सोयरे म्हणून नगरगांव जिल्हो परिशद वांगडी राजश्री काळे, मानाचे सोयरे गुळेली ग्रामपंचायत सरपंच नितेश गावडे, मुख्याध्यापक सूरज नायक, पालक शिक्षक संघ अध्यक्ष दिलीप गांवकार, उपसरपंच रत्नाकर कांसकार, पंच अक्षिता गावडे  आनी हेर वांगडी हाजीर आशिल्ले. शाळेच्या मुख्याध्यापकान सगळ्यांक येवकार दिवन कार्यावळीचें प्रास्तावीक केलें. 

सरपंच नितेश गावडे हांणी आपल्याक शक्य आशिल्ल्यो विवीध सुविधायो आपूण विद्यार्थ्यांक दितलों असो उलो तांणी दिलो. 

दिलीप गांवकार हांणी ह्या वेळार आपले विचार मांडले. उक्तावण सुवाळ्याचें सुत्रसंचालन मृदुला भावे आनी चेतना शिरोडकार हांणी जाल्यार उपकार तेजस्विनी नाबर हांणी मानले. 

ह्या उपक्रमांत 11 शाळांनी वांटो घेतिल्लो. हातूंत गुळेली, नाहीसे, धडा, पैकूळ, मुरमुणें, शेळ, पाडेली, कणकिरे, बाराजण, खोतोडें, मैगिणें हांचो आसपाव आसा. 

सुरवातेक बावटो परेड सर्ती खाला बावट्या विशीं म्हायती दिली. उपरांत सरकारी माध्यमीक शाळेंतल्या भुरग्यांनी मनरिजवणेच्यो कार्यावळी सादर केल्यो आनी पयल्या दिसाची कार्यावळ जाली. 

दुसर्‍या दिसाच्या उपक्रमांत सुरवातेक नाटक,  एकपात्री प्रयोग, रांगोळी, चॉकलेट प्लेट सजावट, नाच, फॅशन शो, मास्टर किलबील-मीस किलबील ह्यो सर्ती जाल्यो. सर्तीचेें परीक्षण राहुल पाटील, श्रुतिका परब पाटील, चंद्रकांत गांवस, रमेश गांवकार, अविता गांवकार,  स्नेहा गांवस हांणी केलें. 

इनामां भेटवण सुवाळ्याक माचयेर सहाय्यक शिक्षणाधिकारी, शिक्षण संचालनालयाचे डॉ. शंभू घाडी मुखेल सोयरे म्हणून मानाचे सोयरे सरपंच नितेश गावडे, भाग शिक्षणाधिकारी श्रीरंग बर्वे, मुख्याध्यापक सूरज नायक, किलबील मुखेली  दिलीप पालेकार, सहायक अजित राणे आनी सगळ्या मुळाव्या विद्यालयाचे अध्यक्ष, परीक्षक रमेश गांवकर आनी अविता गांवकार हाजीर आशिल्ले. 

मुख्याध्यापकांनी येवकार आनी कार्यावळीचें प्रास्तावीक केलें. ह्या वेळार माचयेर हाजीर आशिल्ल्या मानेस्तांनी आपले विचार मांडले. 

अंदूं निवृत्त जावपी शाळेंतले कर्मचारी वासू गुरव आनी शाम मेळेकार हांचो ह्या वेळार भोवमान जालो. कार्यावळीचें सुत्रसंचालन तेजस्विनी नाबर आनी उपकार दिलीप पालेंकार हांणी मानले. कार्यावळींत संगीत सुत्रां संगीत शिक्षक नितेश देसाय, चंद्रकांत नायक आनी कविता पिरणकार हांणी सांबाळ्ळीं. 

मास्टर किलबील म्हणून श्लोक किशोर गावडे आनी मीस किलबील म्हणून प्राप्ती पांडुरंग भट हांची नेमणूक जाली.

चॅम्पियन शाळा सर्तींत पयलें इनाम सरकारी मुळावी शाळा, गुळेली, दुसरें सरकारी मुळावी शाळा  खोतोडा जाल्यार तिसरें इनाम सरकारी मुळावी शाळा, धडा आनी सरकारी मुळावी शाळा, पैकूळ हांका चोवथें इनाम फावो जालें. जाल्यार उमेद वाडोवपी उनाम सरकारी मुळावी शाळा, कणकिरें, दुसरें सरकारी मुळावी शाळा, पाडेली हांकां मेळ्ळें.  

हे कार्यावळीक मंडप उभारपाचें काम शिक्षिका शीतल लाड, सनी काणेकार, कमलाकर गावडे, जाल्यार माची सजावट बक्षीस घडणावळ, शिक्षक प्रेमानंद चारी, पोर्णिमा पाटील, दिव्या मेळेकार, पुष्पगुच्छ आनी बॅच करपाचे काम स्नेहा सावंत हांणी पळयलें. तशेंच जेवणाची वेवस्था सफिया खान, पुजा गांवकार, चंद्रकला म्हार्दोळकार,  मोहिनी गोसावी, प्रविणा नायक, संगीता गावडे हांणी केली. सर्तीचें सुत्रसंचालन प्रज्ञा मणेरकार, क्रुतिका दळवी, प्रसिद्धी नाक, मृदुला भावे, स्नेहा गांवस, चेतना शिरोडकार, तेजस्विनी नाबर हांणी केलें.