भांगरभूंय | प्रतिनिधी
नावेली व्हिलेजर्स युनियनान 21वी ब्रदर युलालियो वाझ यादस्तीक करंड आंतरगांव फुटबॉल सर्त जिखली. फायनलींत ताणें राय स्पोर्टींग क्लबाक टायब्रेकरांत 7-6 अशा गोल फरकांनी हारयलो.
फातोड्डेंच्या डॉन बॉस्को ऑरेटरीन सर्तीचें आयोजन केल्लें.
मॅचीच्या 12व्या मिनटाक गॅरीसन फर्नांडीसान गोल करून राय स्पोर्टींग क्लबाचें खातें उगडलें. पूण, ताची ही आघाडी चड वगत तिगूंक ना. तीन मिनटांनी नावेली व्हिलेजर्सान बरोबरीचो गोल केलो. क्लिंटन निआस्सोन हो गोल केलो.
ते उपरांत 47व्या मिनटाक लॅरेन डायसान गोल करून रायाक परतून एकदा आघाडी मेळोवन दिवपाक मजत केली. हे खेपे रायान ही आघाडी मॅचीचे अखेर मेरेन कायम राखपाचो यत्न केलो. पूण, मॅच सोंपपाक कांय मिनटां बाकी आसतना प्रॅस्टली गोम्सान बरोबरीचो गोल केलो.
टायब्रेकरांत मात नावेली व्हिलेजर्सान जैत जोडून वस्तादपण जोडलें. ह्या जैतान नावेली व्हिलेजर्साक 60 हजाराचें इनाम फावो जालें. जाल्यार रायाक 40 हजाराचेर समाधान मानचें पडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
