भांगरभूंय | प्रतिनिधी
भांगरभूंय । प्रतिनिधी
पेडणेः पंच वांगडी म्हणून तिसरे फावट व्हडा मताधिक्यान वेंचून आयिल्ले तुळशीदास गांवस हांची चांदेल- हसापूर पंचयतीचो सरपंच म्हणून बिनविरोध निवड जातली. गांवस आदले सरपंच आसात. फुडल्या अडेज वर्सा खातीर सरपंच म्हणून तांच्या नांवाची घोशणा पेडणेचो आमदार प्रवीण आर्लेकार हांणी नवनिर्वाचीत पंच वांगड्याचे बसकेंत केली.
वॉर्ड नंबर 4त वेंचून आय़िल्ल्या तुळशीदास गांवस हांचे मताधीक्य दरेका वेंचणुकेंत वाडत आसा अशें आयतारा जाल्ले मतमेजणे वेळार दिसून आयलें. पंचायतींत उप सरपंचपद बायलां खातीर राखीव आशिल्ल्यान रुचिरा रमेश मळीक हिका तें दितले. सत्ताधारी पंच मंडळान थारायल्ले प्रमाण देड वर्स प्रजय पांडुरंग मळीक जाल्यार एक वर्स बाळा बाबू शेटकार हाका सरंपचपद मेळटलें.
सरपंच आनी उप सरपंचानी निवड करपा खातीर अजून तारीख जाहीर जाल्ली ना. मात चांदेल- हसापूर पंचायत मंडळ आनी आमदार प्रवीण आर्लेकार हांची बसका जावन सरपंच आनी उप सरपंचाची बिनविरोध निवड करपाचें थारलां. पेडणे तालुक्यांतल्या हळर्ण- तळऱ्ण, चांदेल- हसापूर आनी कासारवर्णे ह्या तिनूय पंचायतींत भाजपाक भोवमत मेळ्ळां असो दावो आमदार आर्लेकार हांणी केला. सरकाराचे मजतीत ह्या तिनूय पंचायत वाठारांची उदरगत करतले. वेंचून आयिल्ल्या पंच वांगड्यांनी तांच्या वॉर्डांत करपाच्या कामाची वळेरी आपल्याक दिवची अशें आवाहन तांणी केलां. तुळशीदास गांवस हाणे आमदार प्रवीण आर्लेकार आनी पंच वांगड्यांनी सरपंच म्हणून म्हजी निवड केल्या ते खातीर तांणी तांचे उपकार मानल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
