भांगरभूंय | प्रतिनिधी
मंत्री विश्वजीत राणे: सध्याचो प्रकल्पूय बंद करपा खातीर यत्न करपाचें उतर
भांगरभूंय । प्रतिनिधी
वाळपयः प्रदुशणाक लागून पिसुर्लेचो अंबे मेटालीक प्रकल्प लोकां खातीर त्रासदिणो जाला. ह्या प्रकल्पांत थळाव्यांक रोजगार मेळूंक ना. उरफाटे ह्या प्रकल्पांतल्यान निर्माण जावपी प्रदुशण पर्यावरण, शेती- बागायतीं खातीर घातक थारता. हे खातीर हया प्रकल्पाच्या विस्ताराक आपलो खर विरोध आसतलो, अशी घोशणा भलायकी मंत्री विश्वजीत राणे हांणी केली.
पिसुर्लें सत्तरी आयोजीत केल्ले जाहीर सभेंत तांणी ह्या प्रकल्पाक खर विरोध केलो. तशेंच हे संबंदांत मुख्यमंत्री डॉ. प्रमोद सावंत हांचे कडेन चर्चा करून ह्या प्रकल्पाच्या विस्ताराक परवानगी दिवची न्हय, अशी विनवणी करतलों, अशें मंत्री राणे हांणी जाहीर केलें. तांचे हे भुमिकेक हाजीर आशिल्ल्या लोकांनी ताळयो मारून येवकार दिलो.
अंबे मेटालीक प्रकल्प सुरवाती सावनूच प्रदुशण करता. ह्या प्रकल्पांतल्यान भायर सरपी काळो धुंवर हो शेती बागायती खातीर हानीकारक थारता. तशेंच प्रकल्पाच्या भोंवतणच्या वाठारांत रावपी लोकांचे भलायकीच्यो समस्या निर्माण जाल्यात. दम्या सारकीं दुयेंसां वाडपाक लागल्यांत. सध्या ह्या प्रकल्पाचो विस्तार करपाचो आसा, ताका लागून हे संबंदांतलो दाखलो गोंय प्रदुशण मंडळा कडेन मागला. ताका लागून ह्या प्रकल्पा आड फाटल्या पंदरा दिसां दिसां सावन वातावरण तापलां. लोकांक नाका जाल्यार अशा प्रकल्पांक खंयचेच स्थितींत परवानगी दिवचे ना. ताका लागून लोकांनी कसलेच तरेचो भंय बाळगुपाची गरज ना. गरज पडली जाल्यार सध्या अस्तित्वांत आशिल्लो प्रकल्प बंद करपा खातीर यत्न करतले, अशें मंत्री राणे हांणी स्पश्ट केलें.
सध्या बंद आशिल्लो खण वेवसाय सुरू करून थळाव्यांक रोजगार दिवपाचे यत्न करतले. खणींची पावणी रोखडीच जावपाची आशिल्ल्यान पिसुर्लें वाठारांतले बंद आशिल्ले उद्देग धंदे परतून सुरू जातले, अशी आस्त मंत्री राणे हांणी ह्या वेळार उक्तायली.
ह्या वेळार उलयतना थळावी आमदार डॉ दिव्या राणे हांणी अंबे मेटालीक प्रकल्पाच्या विस्ताराक खर विरोध केलो. थळाव्यांच्या हिता आड आशिल्ल्या प्रकल्पाच्या विस्ताराक खंयचेच स्थितींत परवानगी दिवची न्हय, अशी मागणी तांणी सरकारा कडेन केली. थळाव्या वाठारांतल्यो समस्या सोडोवचे खातीर प्राधान्य दितले, अशें आस्वासन तांणी ह्या वेळार दिलें.
जिल्हो पंचायत वांगडी सगुण वाडकार हांणी सांगलें, पिसुर्लें वाठारांत चालू आशिल्ल्या खूबश्या कंपनींनी थळाव्यांक रोजगार मेळना. हे कंपनीच्या प्रदुशणाक मात थळाव्यांक फुडो करचो पडटा. ह्या संबंदांत सरकारान विशेश लक्ष दिवचें, अशी तांणी मागणी केली.
सरपंच देवानंद परब हांणी अंबे मेटालीक कंपनीच्या प्रदुशणाचो मुद्दो मांडलो. तेच प्रमाण पिसुर्लें उद्देगीक वसणूक हो रसायनीक झोन म्हूण जाहीर केल्ल्यान ह्या वाठारांत रसायनीक प्रदुशण जाता. ताका लागून रसायनीक झोन सरकारान रद्द करचो. हे संबंदांत खूब खेपे सरकारा कडेन आनी संबंदीत खात्याचे यंत्रणे कडेन पत्रवेव्हार केला, मात अजून मेरेन ताची दखल घेवंक ना, अशें तांणी सांगलें.
ह्या प्रकल्पाच्या विस्तासाक कशीच परवानगी दिवची न्हय. ह्या प्रकल्पाचो वायट परिणाम चड करून शेती बागायती वांगडाच लोकांचे भलायकेचेर जाता, अशें समाज वावुरपी विनोद शिंदे हांणी सांगलें,
ह्या वेळार बिजली गावडे, बाळकृष्ण शिलकार, आत्माराम परब, राजश्री जल्मी, रुपेश गावडे आनी नामदेव च्यारी हे पंच वांगडी हाजीर आशिल्ले. अशोक नायक हांणी सुत्रसंचालन केलें जाल्यार नामदेव च्यारी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
