भांगरभूंय | प्रतिनिधी
खबरां संस्था
दोहाः संवसारीक फुटबॉल सर्तींतल्या उपांत्यपूर्व फेरयेंतल्या निमणे मॅची आदलो वस्ताद फ्रान्सान इंग्लडाक 2-1 अशें हारोवन उपांत्य मॅचींतली आपली सुवात निश्चीत केली. हे दोनूय पंगड 40 वर्सां उपरांत संवसारीक फुटबॉल सर्तींत एकमेकां आड खेळटाले. हे मॅचींत 78व्या मिनटाक फ्रान्सान गोल केलो. इंग्लंडाचो कॅप्टन हॅरी केनान पेनल्टीचेर गोल करपाची मेळ्ळली संद वोगडायली आनी इंग्लंडाक सर्तीतल्या बिटकी कवळची पडली.
मॅचीच्या 18व्या मिनटाक ऑरेलियन टिचोयुमेनीन फ्रान्साक 1-0 अशी आघाडी मेळोवन दिली. ते उपरांत पयल्या हाफांत दोनूय पंगडांक गोल करपाक जमलें ना. मॅचीच्या दुसऱ्या हॉफान 9व्या मिनटांत इंग्लंडान 1-1 अशी बोरोबोरी केली. कॅप्टन हॅरी केनान पेनल्टीचें रुपांतर गोलांत करून पंगडाचें आव्हान कायम दवोरले. मात 78व्या मिनटाक फ्रान्सान परत आघाडी घेतली आनी तीच निमाणे निर्णायक थारली. ऑलिव्हिएर जिरूडान फ्रान्साचो हो निर्णायक म्हत्वाचो दुसरो गोल केलो.
मॅच सोपपाक कांय मिनटां बाकी आसतना इंग्लंडाक पेनल्टी मेळ्ळी. मात कॅप्टन हॅरी केनाक हे खेपे मात तिचेर गोल करपाक जमलें ना आनी इंग्लंडाचे सर्तीतलें आव्हान सोपले. केनाक पेनल्टी वोगडायली ताची ,सोशल मीडियाचेर बरीच चर्चा जाली. अल बाएत स्टेडियमाचेर जाल्ले हे मॅचींत उपांत्य फेरयेंत प्रवेश करपी चौथो आनी निमणो पंगड फ्रान्स आसतलो हें निश्चीत जालें.
उपांत्य फेरयेंत अर्जेन्टिना आड क्रोएशिया आनी फ्रान्स आड मोरक्को अश्यो मॅची जातल्यो. ह्या दोनूय मॅचींतले जैतिवंत पंगड 18 डिसेंबराक संवसारीक फुटबॉल सर्तीच्या वस्तादपण मेळोवपा खातीर खेळटले.
उपांत्यपूर्व फेरयेंल्या मॅचींत मोरोक्कोन पोर्तुगालाक 1-0 असो हारीचो धपको दिवंन उपांत्य फेरयेंत प्रवेस केलो. ताचे पयलीं शूट आवटात नेदरलँडाक हारोवन अर्जेन्टिनान उपांत्य फेरयेंत प्रवेश निश्चीत केलो. क्रोएशियाकडल्यान पेनल्टी शूट आवटांत हार खावची पडिल्ल्यान ब्राझिलाचें संवसारीक फुटबॉल सर्तींतलें आव्हान सोपलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
