भांगरभूंय | प्रतिनिधी
कतारांत चालू आशिल्ले संवसारीक फुटबॉल सर्तीचे दुसरे क्वॉर्टरफायनलींत अर्जेंटिना पंगडान नॅदरलॅण्डाक पॅनल्टी शुटआवटांत हारयलो. पुर्ण वेळाच्या खेळांत दोनूय पंगड 2-2 अशे बरोबरींत आशिल्ले. ते उपरांत खेळ अतिरिक्त वेळांत पावलो. अतिरिक्त वेळांत लेगीत खंयच्याच पंगडाक गोल करपाक जमलो ना. अखेरेक पॅनल्टी शुटआवटांत मॅचीचो निकाल लागलो. पॅनल्टी शुटआवटांत अर्जेंटिनान 4-3 फरकान मॅच जिखली. ह्या जैता सयत अर्जेंटिना सेमी फायनलींतली सुवात निश्चीत केली.
सेमी फायनलींत अर्जेंटिना 13 डिसेंबराक क्रोएशिया आड खेळटलो.
नहुएल मोलिना हाणें 35व्या मिनटाक गोल करून अर्जेंटिनाक 1-0 अशी आघाडी मेळोवन दिली. लियॉनॅल मॅसीच्या पासाचेर ताणें हो गोल केलो. 73व्या मिनटाक मॅसीन पॅनल्टीचेर गोल केलो. ते उपरांत अर्जेंटिना ही मॅच सहज जिखतलो अशें दिशिल्लें. पूण, तशें जावंक ना. 78व्या मिनटाक बदली खेळगडो म्हूण मैदानांत आयिल्ल्या अबाउट वेघोरस्टान मॅचीतलें चित्र बदल्लें.
83व्या मिनटाक अबाउट वेघोरस्टान गोल करून नॅदरलॅण्डाक परत रुळाचेर हाडलो. 90 मिनटां मेरेन अर्जेंटिनाचे वटेन स्कोर 2-1 असो आशिल्लो. रॅफ्रीन 10 मिनटाचो इंज्युरी टायम दिलो. अबाउट वेघोरस्टान इंज्युरी टायमाच्या निमाण्या मिनटाक गोल करून अर्जेंटिनाक खर धपको दिलो.
मॅच 2-2 उरिल्ल्यान खेळ अतिरिक्त वेळांत पावलो. आतां दोनूय पंगडांक गोल करपाक आनीक 30 मिनटां मेळ्ळीं. पूण, दोनूय पंगडांक गोल करपाक जमलो ना. अतिरिक्त वेळा उपरांत लेगीत स्कोर 2-2 उरलो.
मॅच आतां पॅनल्टी शुटआवटांत पाविल्लो. अर्जेंटिनाचो गोलकीपर एमी मार्टिनेझान उत्कृश्ट प्रदर्शन केलें. ताणें नॅदरलॅण्डाचो मुखेली वर्जिल वान डाईक आनी स्टिवन बर्गहाउस हांचे शॉर्ट्स आडायले. नॅदरलॅण्डा वतीन टिउन कूपमिएनर्स, बाउट बेघोर्स्ट आनी ल्युक डी जॉन्ग हांणी गोल केले. जाल्यार अर्जेंटिना वतीन मॅसी, लियनार्डो पेरेडेज, गोंजालो मोंटियाल आनी लौटारो मार्टिनेज हांणी गोल केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
