भांगरभूंय | प्रतिनिधी
संवसारीक फुटबॉल सर्तीच्या इतिहासांत पयलेच खेपे क्वॉर्टरफायनलींत खेळपी मोरोक्कोन पुर्तुगालाक 1-0 फरकान हारोवन सेमी फायनलींतली सुवात निश्चीत केली.
मोरोक्कोन पयले खेपे संवसारीक सर्तीचे सेमी फायनलींत सुवात मेळयली. 42व्या मिनटाक मोरोक्कोच्या युसेफान उत्कृश्ट रितीन हेडर वरवीं गोल केलो. हो गोल पळोवन पयल्या अर्दांत बाकाचेर बसपी क्रिस्तियानो रोनाल्डो लेगीत अजापभरीत जालो. ह्या गोलाक लागून मोरोक्को संवसारीक सर्तीचे सेमी फायनलींत खेळपी पयलो आफ्रिकेचो देश थारलो. ताचे आदीं कॅमेरून (1990), सेनेगल (2002), घाना (2010) हे क्वॉर्टरफायनलींत पाविल्ले.
पुर्तुगालाच्या पंगड वेवस्थापनान परतून एकदा स्टार स्ट्रायकर रोनाल्डोक बेंचाचेर बसयलो.
पयल्या अर्दांत सुरवाती सावन पुर्तुगालान मोरोक्कोच्या गोलपोस्टाचेर सातत्यान हल्ले करून तांचेर चेपण निर्माण केल्लें. पूण, मोरोक्कोचो गोलकीपर ब्रुनोन पुर्तुगालाचें आक्रमण परतावन लायलें. मॅच जसजशी मुखार वचपाक लागली मोरोक्कोन लेगीत आपल्या आक्रमणाची धार वाडयली. पूण, पासेस आनी बॉल पजेशनाचे बाबतीत बळिश्ट आशिल्ल्या पुर्तुगालाचो गोलपोस्ट अखेरेक 42व्या मिनटाक मोरोक्कोच्या युसेफान भेदलो.
ताणें हवेंत उंच उडी मारीत रोनाल्डो स्टायलीन हेडर वरवीं गोल करून 1-0 अशी आघाडी मेळोवन दिली.
पयल्या अर्दांत एका गोलान फाटीं पडिल्ल्या पुर्तुगालान प्रतिहल्लो केलो. फर्नांडीसान एक नेटाची शूट मोरोक्कोचे दिकेन मारली. पूण, ही शूट गोलपोस्टाच्या खांब्याक आपटून गेली.
दुसरें अर्द सुरू जायना फुडें कांय मिनटांनी रोनाल्डो मैदानांत देंवलो. ते उपरांत पुर्तुगालान गोलाची परतफेड करपाक मोरोक्कोच्या गोलपोस्टाचेर एका फाटल्यान एक हल्ले करपाक सुरवात केली. पूण, मोरोक्कोचो गोलकीपर यासिन बुनोन तांचें हल्ले परतावन लायले. रोनाल्डोक लेगीत व्हडलीशी हालचाल करपाक दिवंक ना. अखेरेक मोरोक्कोन जैत जोडून निमाण्या चारांतली सुवात निश्चीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
