भांगरभूंय | प्रतिनिधी
कतारांत चालू आशिल्ले संवसारीक फुटबॉल सर्तीचे पयले क्वॉर्टरफायनलींत पांच खेपेचो वस्ताद ब्राझील हारलो. संवसारीक क्रमवारींत पयले सुवातेर आशिल्ल्या ब्राझील पंगडाक क्रोएशनयान पॅनल्टी शुटआवटांत 4-2 फरकान हारयलो. ह्या जैता सयत क्रोएशिया सेगीत दुसरे खेपे संवसारीक सर्तीचे सेमी फायनलींत पावलो. जाल्यार दुसरे वटेन ब्राझील पगडाचें सेगीत दुसरे खेपे क्वॉर्टरफायनलींत आव्हान सोंपलें.
स्टार स्ट्रायकर नेमारान अक्स्ट्रा टायमाच्या पयल्या अर्दांतल्या स्टॉपेज टायमांत गोल करून ब्राझीलाक आघाडी मेळोवन दिल्ली. पूण, क्रोएशियाच्या पेटकोव्हिचान 116व्या मिनटाक गोल करून बरोबरी सादली.
क्रोएशियाच्या जैतांत ताचो गोलकीपर लिव्हाकोव्हीच परतून हिरो थारलो. ताणें पॅनल्टी शुटआवटांत एक कीक आडायली. प्री-क्वॉर्टरफायनलींत स्पेना आडचे मॅचींत लेगीत क्रोएशियान पॅनल्टी शुटआवटांत जैत जोडिल्ले. ते मॅचींत लेगीत इव्हानकोव्हीच क्रोएशियाच्या जैताचो हिरो थारिल्लो. ताणें स्पेनाक पॅनल्टी शुटआवटांत एक लेगीत गोल करपाक दिलो ना.
ते पयलीं ब्राझीलान पुर्ण मॅचींत बॉलाचेर आपलो शेक दवरीत उत्कृश्ट पासाचेर क्रोएशियाच्या गोलपोस्टाचेर चेपण दवरलें. पूण, क्रोएशियाची वणत लिव्हाकोव्हिचान ब्राझीलाच्या आक्रमणाक गोलपोस्ट भेदपाची संद दिली ना. 90 मिनटाच्या खेळांत ब्राझीलान वट्ट 18 खेपे क्रोएशियाच्या गोलपोस्टाचेर हल्ले केले. तातूंतले आठ शॉर्ट्स गोलपोस्टाचो अचूक वेध घेवपी आशिल्ले. पूण, बॉल आनी गोलपोस्टाचे मदीं लिव्हाकोव्हिच उबो आशिल्लो.
अॅक्स्ट्रा टायमांत लेगीत ब्राझीलान बरी सुरवात करीत क्रोएशियाच्या बचाव फळयेक आनी गोलकीपराक कामांक लायले. पूण, मॅच जसजशी मुखार वचपाक सुरवात जाली क्रोएशियान प्रती हल्लो करून ब्राझीलाचें टॅन्शन वाडोवपाक सुरवात केली. पूण, अॅक्स्ट्राय टायमाचें पयले अर्द सोंपपाक कांय मिनटां बाकी आसतना नेमारान गोल केलो. ते उपरांत ब्राझीलाक सेमी फायनलींत पावपाक फुडलीं फकत 15 मिनटां मेरेन क्रोएशियाचें आक्रमण आडावन धरपाचें आशिल्लें. पूण, क्रोएशियाच्या ब्रुनो पेटकोव्हिचान 116व्या मिनटाक गोल करून मॅच बरोबरींत हाडून पॅनल्टी शुटआवटांत व्हेली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
