भांगरभूंय | प्रतिनिधी
40 उमेदवारांचो फुडार मतपेटयेंत बंद; फाल्यां निकाल
भांगरभूंय । प्रतिनिधी
पेडणें: पेडणें म्हालांतल्या चांदेल हसापूर, हळर्ण आनी कासारवर्णे ह्या तीन पंचायतींच्यो वेंचणुक 9 डिसेंबराक शांततायेन जाल्यो. 17 सुवातां खातीर 40 उमेदवार रिंगणांत आशिल्ले. तिनूय पंचायतींचो निकाल आयतारा सकाळीं 10 मेरेन कळटलो.
वळपे विर्नोडेंच्या संत सोयरोबानाथ आंबिये म्हाविद्यालयाच्या सभाघरांत सकाळीं 8 वरांचेर मतमेजणी सुरू जातली.
सकाळ सावनूच मतदान केंद्रांचेर बायलो आनी तरणाटे व्हड प्रमाणांत दिसताले. कांय कार्यकर्ते ज्येश्ठ नागरीक, दुयेंत मनशांक आपले गाडयेंतल्यान मतदान केंद्रांचेर घेवन येताले. हे वेंचणुके खातीर पेडणें म्हालाचे मामलेदार अनंत मळीक वेंचणूक अधिकारी म्हूण काम पळयताले. वट्ट 300 परस अदीक पुलीस आनी अधिकाऱ्यांची मतदान केंद्रांचेर नेमणूक केल्ली.
हळर्ण पंचायती खातीर 14, कासारवर्णे पंचायती खातीर 15 आनी चांदेल पंचायती खातीर 11 उमेदवार रिंगणांत आशिल्ले. हळर्ण पंचायतीच्या एससी खातीर राखीव आशिल्ल्या प्रभाग 1 तल्यान विनोद यशवंत हरिजन जाल्यार चांदेल हसापूर पंचायतीच्या प्रभाग 1 तल्यान प्रजय पांडुरंग मळीक बिनविरोध वेंचून आयल्यात.
चांदलचे आदले सरपंच तशेंच उमेदवार तुळशीदास गांवस हांणी सांगलें, आपले जैत निश्चीत आसा. फाटलीं 15 वर्सां आपणे जो वावर केला ताची पोचपावती मतदार आपल्याक दितले. फाटलीं 25 वर्सां सक्रीय राजकारणांत आशिल्ले चांदेल हसापूरचे आदले सरपंच हे खेपे वेंचणूक रिंगणांत देंवूंक ना. युवा शक्तीक प्राधान्य दिवचे खातीर आपूण हो निर्णय घेतिल्ल्याचें सांगलें. तशेंच आपल्या घरच्यांक वा सोयऱ्यांक राजकारणांत हाडपाचो कसलोच यत्न करूंक ना. हेरांक संद मेळची हे खातीर आपूण वेंचणुके पासून पयस रावला, अशी तांणी प्रतिक्रिया दिली.
परिवर्तना खातीर महिला शक्त रिंगणांत
वेंचणूक रिंगणांत तरणाट्यो आनी शिक्षीत बायलांचो आंकडो चड आशिल्लो. तांचे कडेन संपर्क केलो तेन्ना तांणी सांगलें, परिवर्तना खातीर रिंगणांत देंवल्यात. सुशिक्षीत उमेदवार वेंचून आयले जाल्यार सरकाराच्यो येवजण्यो तशेंच सरकाराची जीं कागदपत्रां, परिपत्रकां येतात तीं लोकां मेरेन पावोवपाक मजत जातली. सुशिक्षीत मतदार आमकां वेंचून काडटले, अशें तांणी सांगलें. कांय पंचायतींनी पंच म्हूण वेंचून आयिल्ल्या बायलांचे घरकार पंचायतीच्या वावरांत व्हड प्रमाणांत हस्तक्षेप करतात. हो प्रकार बंद जावपाक जाय, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
