भांगरभूंय | प्रतिनिधी
जीत आरोलकारः सरकारा आड उलोवपाक शकना
भांगरभूंय । प्रतिनिधी
म्हापशें: मोपा विमानतळाक कोणाचें नांव दिवचें, हें भाजप सरकार वा नागरी विमान येरादारी मंत्रालय थारायतलें. तें आमकां मान्य आसतलें. आपूण पयलेच खेपे आमदार जाला. आपले परस वरिश्ठ फुडारी आसात. आपल्या फुडाऱ्यांनी हे आदींच विधानां केल्ल्यान ताचेर आपूण उलोवप योग्य जावचें ना, अशें मांद्रेंचे आमदार जीत आरोलकार हांणी सांगलें.
शुक्रारा म्हापश्यां आमदार आरोलकार पत्रकारां कडेन उलयताले. मोपा विमानतळ नामकरणा विशीं मगो पक्षाचो निर्णय आपल्याक मान्य आसा. तशेंच आघाडी पक्षांत रावून आपूण सरकारा आड उलोवपाक शकना, अशेंय आरोलकार हांणी सांगलें.
आपूण मगो पक्षाचो आमदार. भाऊंचे विचार आनी तत्वांचो आमी आदर करतात. पण आघाडीच्या सरकारान रावून युती धर्म आनी सरकाराच्या निर्णया आड वचपाक शकना, अशें स्पश्टीकरण आमदार आरोलकार हांणी दिलें. मोपा विमानतळाक कोणाचें नांव दिवचें वा दिवचें न्हय तें आपल्या हातांत ना. जर आशिल्लें जाल्यार आयजूच आपूण नांवाची पाटी लावन तें जाहीर करपाचों. पक्षांत वा सरकारांत रावून आपल्याच परिवारा आड उलोवप कितलें योग्य? आपल्याक खूब दिसलें वा मांद्यां ताजमहल बांदपाचें थारायलें जाल्यार तें शक्य आसा व्हय, असो प्रस्न आमदार आरोलकार हांणी उपस्थीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
