प्रा. रामदास केळकार हांच्या ई- पुस्तकाचें प्रकाशन

भांगरभूंय | प्रतिनिधी

पणजी : करियर विशयाचेर ‘भांगरभूंय’ दिसाळ्यांत सातत्यान बरोवपी प्रा. रामदास केळकार हांच्या करियर विशया वयल्या ई- पुस्तकाचें ‘भांगरभूंय’ चे संपादक महेश दिवेकार हांचे हस्तुकी एका ल्हानश्या सुवाळ्यांत प्रकाशन जालें. आतां ‘बुकगंगा’ हे माचये वयल्यान हें पुस्तक सगल्यां खातीर उक्तें आसा.
‘चलात करियरच्या वाटेन’ ह्या शीर्षकाच्या ह्या ई- पुस्तका भितर भांगरभूंयंत प्रकाशीत जाल्ले करियर विशया वयले लेख छापल्यात. ह्या दिसाळ्याच्या वाचप्यां खातीर ही खोशेची गजाल. खास करून विद्यार्थ्यांक स्वताचो फुडार घडोवपाक ह्या पुस्तकाचो फायदो जातलो. करियर हो विशय सगळ्यांकूच म्हत्वाचो आशिल्ल्या कारणान आता बुकगंगाची व्हड माची ह्या पुस्तकाक मेळ्ळ्या. इंटरनेट वापरपी कोंकणी वाचकांकूच न्हय तर हेर भाशिकांकूय हाचो उपेग जातलो, अशी आस्त ताणीं उक्तायली.
शिक्षण तज्ञ आनी लेखक प्राचार्य डॉ. मनोज कामत हांणी प्रकाशना विशीं खोस उक्तायतना आधुनिक युगान इंटरनेटाचो वापर वाडिल्ल्या कारणान बुकगंगा सारखी माची मेळप चड गरजेचें आसा अशें मत उक्तायलें. हाचो लाव फक्त गोयंकारूच न्हय तर संवसारभरांतले भारतीय लेगीत घेवपाक शकतले, अशें तांणी सांगलें. ज्येश्ठ पत्रकार गंगाराम म्हांबरे हांणी ह्या पुस्तकाक प्रस्तावना बरयल्या. तांणी अशें पुस्तक येवप महत्वाचें आनी ई बुकाच्या माध्यमांतल्यान तें चड वाचका मेरेन पावतलें अशी आस्त
परगटायली.
हृषिकेश आठवले हांणी बुकगंगा माचयेची वळख करून दिली. हे माचवे वेल्यान हजारांनी पुस्तकाची विक्री जाता. तशेंच पुस्तकांचो परिचय करून दितात. 1931 सावन हें पुस्तकालय चालू आसा. कांय वर्सां पयलीं तांणी ई- बूक प्रकाशित करप सुरू केलां. विंगड विंगड पुस्तकां बुकगंगा वरवीं घरांत बसून विकत घेवपाक मेळटा. देशांतल्या हेर भाशांतलीं पुस्तकांय हांगा मेळटात, अशेय तांणी सांगलें.
लेखक प्रा. केळकार हांणी करियर मार्गदर्शन बरयतना आयिल्ले अणभव निमणे तांणीच उपकार मानले. कुलभूषण केळकार हांच्या हस्ते भेटवस्तू आनी फुलां दिवन सगल्यांक येवकार दिलो. श्री. केळकार हांचें हें कोंकणीतलें दुसरें पुस्तक जावन आसा .

वेबसायटीची लिंक-

https://www.bookganga.com/eBooks/Books/details/5486760765291802814?BookName=Chala-Careerachya-Vatena