भांगरभूंय | प्रतिनिधी
संवसारीक फुटबॉल सर्तींतले क्वॉर्टरफायनलींतल्या मॅचींक आयच्यान सुरवात जाता. पयली मॅच पांच खेपेचो वस्ताद आनी क्रोएशिया ह्या पंगडां मदीं जातली.
चार वर्सां पयलीं फ्रान्सा आडचे फायनलींतले मॅचींत क्रोएशिया हार घेवची पडिल्ली. पूण, हे खेपे परतून फायनलींत खेळपाचो ताचो यत्न आसा. आमी फकत क्वॉर्टरफायनलींत पाविल्ल्यान समाधानी ना. आमकां बळिश्ट पंगडा आड खेळपाचें आसा हें आमी जाणात. आमी कांय विभागांनी घटमूट आसात आनी आमकां स्वताचेर विस्वास आसा अशें मोदरिचान म्हणलें.
मोदरिच ब्राझिलाच्या कांय खेळगड्यांच्या खेळा विशीं बरे तरेन खबर आसा. हाचें मुखेल कारण म्हणल्यार माद्रिदांत तो ज्युनियर, रोड्रिगो आनी इडेर मिलिटियाओ वांगडा खेळटा.
37 वर्सां पिरायेचो अणभवी मिडफिल्डर मोदरिचा कडल्यान आपणेन खूब कितें शिकला अशें ज्युनियरान म्हणलां.
ब्राझिला भशेन क्रोएशिया अंदूंचे सर्तींत फकत दोनूच गोल घेतल्यात. ताणें कॅनडाक 4-1 फरकान हारयिल्लो, ते उपरांत मोरोक्को आनी बेल्जियम हांच्या आड गट पांवड्यो मॅची गोलाविणें बादाबाद दवरिल्ल्यो. प्री-क्वॉर्टरफायनलींत क्रोएशियान जपानाक अतिरिक्त वेळांत 1-1 असो बरोबरींत आडायल्या उपरांत पॅनल्टी शुटआवटांत हारयिल्लो.
क्रोएशियाच्यो संवसारीक सर्तींतल्यो फाटल्या पांचांतल्यो चार मॅची अतिरिक्त वेळांत गेल्यात. तशेंच फाटल्या 9 नॉकआवटांतल्यो सात मॅची जिखल्यात.
दुसरे वटेन संवसारीक सर्तीच्या नॉकआवट फेरयेंत 2002 उपरांत युरोपीयन पंगडा आड पयलें जैत जोडपाक इत्सूक आसतलो. ब्राझिलान 2002त जर्मनी आड जैत जोडिल्लें.
गट पांवड्या वयल्या मॅचींनी ब्राझिलान सर्बिया आनी स्वित्झर्लेण्ड ह्या पंगडांक हारयिल्ले. पूण, तिसरे मॅचींत राखीव खेळगड्यांक खेळपाची संद दिल्ली. पूण राखीव खेळगड्यांक म्हणपा सारकें प्रदर्शन करपाक जमूंक ना आनी कॅमरुना आड हार घेवची पडली.
प्री-क्वॉर्टरफायनलींत ताणें दक्षीण आफ्रिकेचो खुर्दो केलो. ब्राझिल सेगीत आठवी आनी वट्ट 14वी संवसारीक सर्तीची क्वॉर्टरफायनल खेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
