भांगरभूंय | प्रतिनिधी
गुजरात आनी हिमाचल प्रदेश विधानसभा वेंचणुकेचे निकाल जाहीर जाल्यात. गुजरातांत भाजपाचें सरकार आयलां. हिमाचलांत काँग्रेसीचें. गुजरातांत कितें जाता, हाचेर देशांतल्या भोवतेक राजकारण मोगींचें लक्ष आशिल्लें. कारण थंय फाटलीं 27 वर्सां भाजपाचें सरकार सत्तेर आशिल्लें. साहजिकूच जनमत भाजपाच्या विरोधांत आसतलें, अशें बऱ्याच विरोधकांक दिशिल्लें. पूण, हे सगले अदमास मातये भरवण जाल्यात. गुजरातांत भाजपान फाटोफाट सातवे खेपे कमळ फुलयलां. तेंय विक्रमा सयत. 2002 त भाजपाक 127 जागे मेळिल्ले, तर 1985 त त काँग्रेसीक 149. अंदूं हे दोनूय विक्रम मोडले. हिमाचलांतली वेंचणूक अटीतटीची जाली. गुजरातांत मात भाजपान विरोधकांक कांय न्हय करून धुल्ल खांवयलो. गुजरातांत भाजपा 156 जाग्यांचेर मुखार आशिल्ली. काँग्रेस 17 तर आप 5 जाग्यांचेर. हिमाचलांक काँग्रेस 40 तर भाजपा 25 जाग्यांचेर मुखार आशिल्ली. आपाक एकूय जागो मेळूंक ना. निमणे निकाल रातीं उसरां मेरेन जाहीर जावंक नाशिल्ले.
कोणूय जिखूं, मागीर तो एक मतान जावं वा शंबर, जैत हें जैत आसता. ताका कोणे नांवां दवरूंक जायना. मात फाटल्या कांय वेंचणुकां सावन सगलेच पक्ष एकमेकांचेर खर, कांय वेळार सकयल्या पांवड्याची टिका करतना पळोवंक मेळटा. हातूंत संवसारांतल्या सगल्यांत व्हडल्या आमच्या लोकशाय देशांतलें वातावरण इबाडटा. तशें जावंक फावना. सगल्यांनी जैत आनी हार खिलाडू वृत्तीन स्विकारूंक फावो. आम आदमी पक्षान गुजरातांत सदचे भशेन आक्रमक प्रचार केलो. मात तांकां व्हडलेशें जैत मेळ्ळें ना. तरीय गोंयांत दोन जागे मेळ्ळे तशेंच थंय तांणी पांच जागे घेवन खातें उक्तें केलां. फुडाराक नेटान प्रचार करीत जाल्यार पंजाबात जालो तसो बदल जावं येता. गुजरातांत भाजपाची तशी दिल्लीचेर आपाची सत्ता. ह्या वेंचणूक प्रचारांत दोनूय पक्षांनी एकमेकांचेर उज्याचे जाळ सोडले म्हणल्यार जाता. सवलती, अनुदानांचोय पावस रकयलो. मात मतदारांनी जैत भाजपाचे तागडेंत घालें. मोरबी पूल दुर्घटनेचेंय भांडवल जालें. तरीय ताचो थळाव्या भाजपा उमेदवाराच्या जैताचेर कांय परिणाम जालो ना. तो सहज जिखलो.
निकाला उपरांत ट्विटांचो हुंवार आयला. गुजरातांत सदांच इतिहास घडोवपाचें काम केलां. फाटल्या दोन दशकांत नरेंद्र मोदी हांच्या फुडारपणा खाला भाजपान गुजरातांत विकासाचे सगले विक्रम मोडल्यात, ताका लागून गुजराती लोकांनी भाजपाक आशिर्वाद दित जैताचे सगले विक्रम मोडल्यात, अशें केंद्रीय गृहमंत्री अमित शहान ट्विट केलां. 2024 त लोकसभा वेंचणूक आसा, तेन्नाय विक्रम मोडपाचो भाजपाचो यत्न आसतलो. काँग्रेसीचो 404 जाग्यांचो विक्रम आसा. तेवटेन आम आदमी पक्षान गुजरातांतलीं 13 टक्के मतां मेळोवन राष्ट्रीय पक्ष म्हूण मान्यताय मेळयल्या. दिल्ली महापालिकेंतली भाजपाची 15 वर्सांची सत्ता तांणी सोंपयल्या. म्हणटकच लोकसभा वेंचणुकेंत आपाचो वेगळो नेट आसतलो, हें सांगपाक नाका. गुजरातांत भाजपाची मतांची टक्केवारी वाडल्या आनी काँग्रेसीची देंवल्या. म्हणटकच आप काँग्रेसीक मारक थारतली? गोंयांत फुडले वेंचणुकेंत हें चित्र दिसतलें? गुजरात भाजपाचेंच आशिल्लें. 2024 तले लोकसभा वेंचणुकेंत हेर राज्यांनी होच करिश्मा दिसता काय ना, हाची उमळशीक राजकी जाणकारांक आसतली.
गुजरातांत पोकळ आस्वासनां, रेवडी वांटप आनी कांय जाती, धर्मांच्या मतदारांची अपुरबाय हाका गुजराती मतदारांनी न्हयकारले, अशी टिका भाजप फुडाऱ्यांनी केल्या. सरकार इतलीं वर्सां सत्तेर आसूनय लोकांनी आमकां वेंचून दिले, अशी कांय जाणांची प्रतिक्रिया. तर हिमाचल प्रदेशांत भाजपा सरकाराच्या विरोधांत ल्हार जाणवतालें. काँग्रेसीन पोरणी पेन्शन येवजण परत लागू करपाचें आस्वासन दिल्लें. तातूंत म्हारगाय. हाचो फटको भाजपाक बसलो, अशें कांय जाणकारांचें मत. एकूणच रेवडी वांटप म्हणल्यार फुलू खुस्तार खोजने प्रकार हिमाचलांत जैतिवंत थारलो, अशें कांय जाणांक दिसता. उरफाटें आपान गोंय आनी गुजरातांत आकर्शक आस्वासनां दिवनूय लोक तांचे फाटल्यान रावंक नात. पूण दिल्लींत, पंजाबांत ह्याच आस्वासनांनी तांकां जैताची घसघशीत माळ घाल्या. भारतीय मतदार आस्वासनां भुलून मतां दितात, काय पक्ष पळोवन ते विशीं राजकी पंडित पसून गोंदळांत पडल्यात. प्रधानमंत्री मोदी हांणी हिमाचलांत भाजपा आनी काँग्रेस हांचे मदीं मतांचो फरक फक्त 1 टक्को आसा, अशी प्रतिक्रिया दिल्या. ताचेरूय प्रतिक्रिया येवपाक लागल्यात.
वेंचणुको जाल्यो, निकाल लागलो. तो कौल राजकी पक्षांनी स्विकारचो. फोडाफोडीचें राजकारण जावचें न्हय…. एकमेकांचेर चिखलफेक तर नाकाच नाका. ताचे परस उदरगतीच्या कामांची सर्त लागची, अशीच मतदारांची अपेक्षा आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
