भांगरभूंय | प्रतिनिधी
भांगरभूंय । प्रतिनिधी
पोरणे गोंयः सान्तइस्तेव पंचायत वाठाराचो पर्यटन ग्राम उदरगत येवजणेत आसपाव करपाक आयताराक जाल्ले पंचायतीचे ग्रामसभेंत लोकांनी विरोध केलो. पयलींच्या पंचायत मंडळान हे खातीर पास केल्लो थाराव फाटीं घेवपाचो निर्णय ह्या वेळार घेतलो. आदली सरपंच जुवांवनिता डिसोझा हिणे पर्यटन खात्याक सान्तइस्तेवाचो ग्राम उदरगत येवजणेत आसपाव करपा खातीर पत्र धाडिल्लें. लोकांक विस्वासांत घेनास्तना आदल्या पंचायत मंडळान हो निर्णय घेतिल्लो अशें जोजेफ मार्कुस हाणे ग्रामसभेंत सांगलें.
आदल्या पंचायत मंडळान लोकांक कांयच सांगनास्तना ग्राम उदरगत येवजणेत पंचायत वाठाराचो आसपाव करपाक सांगलें. म्हायती हक्क कायद्या खाला आमकां ही म्हायती मेळ्ळी अशें तांणे सांगलें. पर्यटक ग्राम उदरगत येवजणे खाला सगळे अधिकार तिसऱ्या पक्षाक दिवपाची तजवीज करपाक जाय अशें तांणे ग्रामसभेक सांगलें. ह्या उपरांत आदल्या पंचायत मंडळान घेतिल्लो थाराव रद्द करपाचो थाराव ग्रामसभेंत पास केलो. संबंदीत सरकारी यंत्रणेक तो धाडटले.
सान्तइस्तेव वाठारांत झुवारी न्हंयेतली रेंव काडपाक परवानगी दिवपी सरकारी निर्णयाक ग्रामसभेंत आक्षेप घेतला. जें कोण रेंव काडटात तांचेर कारवाय करपा खातीर पोरणे गोंय पुलीस स्टेशन तशेंच खण खात्याक पत्र बरोवपाक लोकांनी पंचायत मंडळाक सांगलां. कमकुवत जाल्ल्या टोंक पुला वयल्यान रेंवेची येरादारी करपी ट्रक व्हरतात तें बंद करपाची मागणी लोकांनी केल्या.
ग्रामसभेंत ग्राम उदरगत तशेंच जैव विविधताय वेवस्थापन समिती वेंचून काडली. फुडले ग्रामसभेंत कोयर वेवस्थापन समिती आनी हेर समिती वेंचून काडपाचें थारयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
