भांगरभूंय | प्रतिनिधी
खबरां संस्था
दोहाः प्री क्वार्टन फायनलींत ऑस्ट्रेलियेक 2-1 अशें हारोवन लिओनेल मेसीच्या अर्जेन्टिनान फिफा संवसारीक फुटबॉल सर्तीचे क्वार्टर फायनलींत प्रवेश केलो.
मेसी मेन ऑफ दी मॅच थारलो. अर्जेन्टिना खातीर ऑस्ट्रेलेये आडचे मॅचींत मेसीन पयलो गोल करून पंगडाच्या जैतांत म्हत्वाचें योगदान दिलें. संवसारीक फुटबॉल सर्तींत 8 गोल करपी दिग्गज डिएगो मॅराडोनाक फाटीं उडोवन मेसीन हे सर्तींतलो आपलो 9वो गोल केलो. तशेंच बाद फेरयेंतलो अर्जेन्टिनाचो हो पयलो गोल थारलो.
ह्या गोलाक लागून अर्जेन्टिना खातीर संवसारीक करंड फुटबॉल सर्तींत सगळ्यांत चड गोल करपी तो दुसरो खेळगडो धारला. आतां ग्रॅब्रियल बतिस्तुता परस फकत एक गोलान मेसी फाटीं आसा. मॅन ऑफ मॅच पुरस्कार स्विकारतना ताणे आपल्या चाहत्यांचें उपकार मानले.
अर्जेन्टिना- ऑस्ट्रेलिया हाचें मदी अहमद बीन अली स्टेडियमाचेर आयतारा जाल्ले मॅचींत मेसीन आक्रमक खेळान ऑस्ट्रेलियेचे बचाव फळयेचेर सामकें चेंपण हाडलें. पयल्या हाफांत एका गोलाची आघाडी घेतल्या उपरांत अर्जेन्टिनान ब्रेक उपरांत रोखडीच आपली रणनिती बदल्ली आनी तीन खेळगड्यांच्या बचावाचो पवित्रो तांणी घेतलो. आणी वेवस्थीत चाल रचून दुसरो गोल केलो. मॅट रायनान केल्ले चुकीचो ज्युलियन अल्वारेझान फायदो घेवन व्हो गोल केलो. अर्जेन्टिना खातीर संवसारीक फुटबॉल सर्तींत सातत्यान गोल करपी मेसी तिसरो फुटबॉल खेळगडो थारलो. पयल्या हॉफात गोल करून ताणे आपली तांक सिद्ध केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
