भांगरभूंय | प्रतिनिधी
नातें म्हणनां फुडे आमच्या मुखार वेगवेगळीं मोगाचीं रूपां उबीं रावतात. जशें आवय- भुरग्यालें नातें, घोव- बायलेचें नातें, बापूय आनी भुरग्यां मदलें नातें, भयण- भावाचें नातें आदी. भयण आनी भावाचें नातें म्हणटना हो एक आगळोच मोग आमी म्हणू येता.
भाव- भयणीचें नातें सगल्यांत घट वा वेगळेंच नातें, अशें आमच्यान म्हणपाक जाता. दर एके चलयेक आपल्याक एक भाव आसचो तशेंच दर एका चल्याक आपणाक एक भयण आसची, अशें दिसता. मागीर ल्हानपणांत तीं कितलींय झगडूं, त्या झगड्यांनी लेगीत मोग लिपिल्लो आसता. एका खेळण्याक वा चाॅकलेटीक लागून जाल्ली भावा- भयणीं मदलीं झगडीं. उपरांत भावान भयणीलें केंस ना जाल्यार गाल ओडप आनी भयणीन व्हडल्यान आड्डून “मां गे” म्हणटकच भावान भायर धांव मारप.
मागीर भयणीन भावाची बापाय कडेन कागाळ करप आनी बापायन भावाक बरोच तापोवप. तापयतकच भाव रडटा तेन्ना मात भयणीक भावाचीं दुकां पळोव नजो जाल्ल्यान ताचे कडेन वचून बसप आनी ताची अपुरबाय करप. “वाह!” काय बरे सोबीत, सुंदर हें भावा- भयणीचें नातें.
बापाय फाटल्यान चलयेचो चड मोग करपी, ताका सांबाळून घेवपी, बापाय वरीच ताची जतनाय घेवपी, ताच्या बऱ्या- वायटान , दुखान- सुखान ताचो आदार जावपी, हो भाव आसता. आमी रक्षाबंधन आनी भाऊबीज करतात, कारण भावा- भयणीचें नातें बरें उरचें, ह्या नात्याक कोणाची नदर लागची न्हय, हें जें मोगान भरिल्लें मोलादीक नातें आसा तें अशेंच उरचें. इतलेंच न्हय तर सगल्यांत म्हत्वाचें भावान भयणीची राखण सदाकाळ करची ह्या हेतुन तें करप जाता.
भाव हो भयणी वांगडा ल्हानपणांत कितलोय झगडूं, पूण भयण जेन्ना लग्न जावन घोवाल्या घरा वता तेन्ना भावाच्याच दोळ्यांत चड दुकां भरतात.
भाव लग्न जातकच भयणीक अशें दिसता की आतां भाव बदलतलो, आमचें नातें पयलीं सारकें उरचें ना, पूण भाव आपलें कर्तव्य केन्नाच विसरना, तो तें बेस बरें तरेन निभयता. आपले बायलेक सांबाळटा आसतना तो आपले भयणीक पयलीं सारकेंच म्हत्व दिता. कांय कडेन आमकां अशेंय दिसून येता की लग्न जाले उपरांत भाव- भयणीचो पयलीं सारको संबंध उरना. तो उणो जाता, पूण भावा- भयणीचें मुळांतलें, ल्हानपणांतलें नातें खोल आसत जाल्यार तें शेवट मेरेन तशेंच उरता. तातूंत कांयच बदल जायना. भयणूय भावाचो पयलीं सारकोच मोग करता आनी भावाचेय बाबतीन तेंच जाता.
भयणीलें लग्न जावन भयण घोवाल्या घरा गेली तरीय भाव- भयणीचें नातें घट उरताच. तें मागीर फोनाच्या माध्यमांतल्यान वा प्रत्यक्ष भेटींतल्यान आसूं येता. इतलें निर्मळ आनी आपलेंपणाचें नातें आमकां आनीक खंयचेंच पळोवपाक मेळना.
अनिषा उसकयकार
8698515749
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
