म्हापशेंचो कोयर एकठांय करतली खाजगी संस्था

भांगरभूंय | प्रतिनिधी

पालिका मंडळाचे बसकेंत निर्णय; कोयराचो विलो लावपा खातीर मागयतले निविदा

भांगरभूंय । प्रतिनिधी

म्हापशें: म्हापशें पालिका वाठारांतल्या घराघरांतलो आनी हेर कोयर वेवस्थापनाचें पुराय काम आतां खाजगी संस्थेक (आवटसोर्स) करपाचो निर्णय पालिका मंडळाचे बसकेंत घेतला. ते भायर आसगांव सड्या वयल्या कोयर प्रकल्पांतलो कोयर वेगळो करपा पासून ताचो विलो लावपाचें काम खाजगी संस्थां कडेन निविदा मागोवन दिवपाचो निर्णय घेतला. नगराध्यक्ष शुभांगी वायंगणकार हांचे अध्यक्षते खाला बुधवारा जाल्ले पालिका मंडळाचे खाशेले बसकेंत हो थाराव मंजूर केलो.

ह्या वेळार उपनगराध्यक्ष चंद्रशेखर बेनकार, पालिका मुख्याधिकारी अमितेश शिरवयकार आनी नगरसेवक, नगरसेविका, पालिका अभियंते हाजीर आशिल्ले.

हे आदीं पालिकेन प्रभाग 1 ते 10 मदल्या घराघरांतलो कोयर एकठांय करपाचें काम आवटसोर्स पद्दतीन सुरू केलां. ही येवजण बरे तरेन चलता हे खातीर तशेंच पालिके वयली कोयर वेवस्थापनाची जापसालदारकी उणी करपाच्या उद्देशान उरिल्ल्या प्रभागां सयत विसूय प्रभागांल्या कोयर वेवस्थापनाचें काम हे फुडें आवटसोर्सींग करपाचो प्रस्ताव नगराध्यक्षान बसकेंत दवरलो आनी चर्चे उपरांत पालिका मंडळान ताका मंजुरी दिली.

बसकेंत उपनगराध्यक्ष बेनकार, नगरसेवक आनंद भाईडकार, सुधीर कांदोळकार, सुशांत हरमलकार, अ‍ॅड. तारक आरोलकार, विराज फडके, कमल डिसोझा, अ‍ॅड. शशांक नार्वेकार, आशिर्वाद खोर्जुवेंकार आनी केरॉल ब्रागांझा हांणी कोयर वेवस्थापना विशीं मुद्दे मांडले आनी विवीध सुचोवण्यो केल्यो.

मुख्याधिकारी शिरवयकार हांणी नगराध्यक्षांचे वतीन ह्या आवटसोर्स प्रस्तावाची सविस्तर म्हायती पालिका मंडळाक दिली. ह्या कंत्राटाचे प्रक्रियेक 60 दिसांचो वेळ लागतलो. सध्या प्रभाग 1 ते 10 तल्या कोयर वेवस्थापनाचें चालू आशिल्लें आनी मुजतवाड दिल्लें आवयसोर्सींगचें कंत्राट 12 डिसेंबरांत सोंपता. ताका लागून ह्या कंत्राटा विशीं निर्णय घेवपाचो सल्लोय तांणी पालिका मंडळाक दिलो. पूण ताचेर हे बसकेंत कसलोच निर्णय जावंक ना. मजगतीं, सध्या 10 प्रभागांतलें कोयर वेवस्थापन आवटसोर्साचेर पालिकेक दर म्हयन्याक 10 लाख रुपया खर्च येता. शारांत दर दिसा 24 टन कोयर तयार जाता. तातूंत 14 टन ओल्या आनी 10 टन सुक्या कोयराचो आस्पाव आसा.

कोयर वेवस्थापनाची सेवा रात दीस चलतली

कोयर वेवस्थापन आवटसोर्सींगाच्या थारावा प्रमाण ही सेवा दीस रात चलतली. पालिका आपल्यो कोयर व्हरपाच्यो गाडयो भाड्यान कंत्राटदाराक दितली. ह्या गाडयांचे देखरेखीची जापसालदारकी कंत्राटदाराची आसतली. तातूंत पालिका स्वता खातीर महसूल निर्मिती करतली. कंत्राटदार घराघरांतलो कोयर एकठांय करपा पासून शारांतल्या ब्लॅक स्पॉटांची संख्या शुन्याचेर हाडपाची जतनाय घेतली. बागेंतलो कोयर, बांदकामाचें टाकावू साहित्य, तण कापप, मार्केंटांतलो कोयर एकठांय करप, रस्त्यांची नितळसाण, ई- कोयर, डायर आनी पॅम्पर्साचो कोयर, जात्रा आनी फेस्तांतलो कोयर, कवच्यांच्या कोयराचो विलो लावपाची जापसालदारकी कंत्राटदाराची आसतली.

कंत्राटाचो काळ आसतलो तीन वर्साः नगराध्यक्ष

सध्या पालिके कडेन सुमार 140 दिसवड्या वयले कामगार आसात. हे कामगार ह्या आवटसोर्सींग कंत्राटदाराक दितले. हे खाजगी संस्थेच्या कामगारांक गणभेसा वांगडाच वैयक्तीक संरक्षणात्मक उपकरणां दिवपाचें बंधन आसतलें. पालिका रोखडीच निविदा काडून ही प्रक्रिया चालीक लायतली. हे आवटसोर्सींग कोयर वेवस्थापनाच्या कंत्राटाचो काळ उण्यांत उणो 3 वर्सांचो आसतलो, अशी म्हायती नगराध्यक्ष शुभांगी वायंगणकार हांणी दिली.