भांगरभूंय | प्रतिनिधी
भांगरभूंय । प्रतिनिधी
केरी-सत्तरीः कारापूर- साखळी हांगच्या डॉ हेडगेवार विद्या मंदिराचें तीन दिसांचें निवासी शिबीर अडवय हांगच्या पिकॉक फॉर्मांत जालें. तातूंत 118 विद्यार्थी आनी 15 शिक्षक वांटेकार जाल्ले. शिबिराचें उक्तावण व्यंकटेश देसाय हांणी केलें. ह्या वेळार कुजिरा- बांबोळेच्या हेडगेवार उच्च माध्यमीक विद्यालयाचो प्राचार्च दीपक आमोणकार, स्वाती नायक देसाय, पालक-शिक्षक संघाची उपाध्यक्ष राधिका कामत सातोस्कार हाजीर आशिल्लें. विद्यार्थ्यां मदीं सामाजीक मूल्यांची रुजवण जावची, कसलेय परिस्थिती कडेन स्वताक कशें जुळोवन घेवव हाचो अणभव घेवपा खातीर निवासी शिबिराचें आयोजन करतता अशें ज्येश्ठ शिक्षिका सुवर्णा पार्सेकार हिणे सांगलें.
शिबिरांत नेतृत्व उदरगत ह्या विशयाचेर दीपक आमोणकारान मार्गदर्शन केलें. समर्पण ध्यान विशयाचेर सुनिता पाळणी, संवाद विशयाचेर अॅड स्वाती केरकार, जुवानपण ह्या विशयाचेर डॉ पंकज गांवकार आनी डॉ तन्वी नायक आनी देवभूंय गोंय ह्या विशयाचेर अभिदीप देसाय आनी प्रवास वर्णनाचेर राजेंद्र सावयकारा, सूत्रसंचालनाचेर सुदन फडते हाणे मार्गदर्शन केलें.
संस्कार शिबिरा वरवीं विद्यार्थी स्वावलंबी, शीस्तबद्द जातात. विद्यार्थ्यांक ताचो जिणेन खूब फायदो जाता अशें समारोप सत्राचे मुखेल सोयरे हेडगेवार शिक्षण प्रसारक मंडळाचे सचीव सुभाष देसाय हांणी सांगलें. ह्या वेळार प्रशांत देसाय, मुख्याध्यापक सदानंद मिशाळ, वेवस्थापक सदानंद डिचोलकार आनी भांडारी उल्हास केरकार हाजीर आशिल्ले. सूत्रसंचालन ऋषिकेश शेटगांवकारान केलें आनी आकाश पार्सेकारान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
