भांगरभूंय | प्रतिनिधी
भांगरभूंय । प्रतिनिधी
माशेलः मारुती नगर दवर्ली हांगच्या साई सेवेकरी मंडळावतीन बुधवारा दवर्ली तें बोरये साईबाबा देवळा मेरेन 200 पदयात्रींची 14 किलोमीटर पदयात्रा काडली. नावेलीचो आमदार उल्हास तुयेकार हांणी पालखेक खांदो मारून पदयात्रेक सुरवात करून दिली. ताचे पयलीं मंडळाचो अध्यक्ष माश्र्वीन नायक हांच्या घरा सकाळीं 7.30 वरांचेर साई चरण पादुका, स्वामी समर्थ हांचें दर्शन घेवन धोल ताश्यांच्या गजरांत मारूतीनगर पेडे हांगा हाडून पालखेंत दवोरल्यो. ह्या वेळार आमदार तुयेंकाराचो आश्र्वीन नायक हाचे हस्तुकीं भोवमान केलो आनी पदयात्रा सुरू जाली.
आर्लें हांगा पदयात्रींनी नास्ता घेतलो. राय हांगच्या श्री रामेश्वर देवळांत पादुकांची पूजा जाली. थंय तम्मा प्रभू हांणी पदयात्रींक अल्पोपहार दिलो. बोरये सर्कला कडेन पंढरी नायक आनी नवदीप नायक हांणी तांका संत्रीं दिलीं. दनपारां 12 वरांचेर पदयात्रा अवेडें- बोरये हांगा साईबाबा देवळा कडेन पावली. पदयात्रेंत शिर्डी साईबाबा संस्थानाचे आदले ट्रस्टी गोपीनाथ (अण्णा) कोते पाटील, गोंय साईसेवा मंडळाचो अध्यक्ष वजाधर (राजू) कळंगुटकार, उद्देजक अनिल शिवराम नायक, साई नवदुर्गा वारकरी मंडळाचो शेखर नायक, आनंद नायक, जयेश वेर्णेकार, साईबाबा देवस्थान समितीचो आदलो अध्यक्ष सुभाष नायक आनी हेर मानेस्त वांटेकार जाल्ले.
कोते पाटील हांणी नाल्ल फोडून पालखी साईबाबा देवळाच्या दारांत हाडली. देवळांतल्या म्हापूजेचो येजमान सौ हेमा आनी उमेश बोरकार हांणी पालखेंतल्या पादुकाचे पूजेन पदयात्रा सोपली. म्हाप्रसाद घेवन पदयात्री सागर पेडणेकार हांणे दवोरिल्ले बशीन दवर्ली गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
