भांगरभूंय | प्रतिनिधी
भांगरभूंय । खबरां मेज
पणजीः जो मेनी फुर्तादो ह्या नांवान फामाद आशिल्ले तियात्रिस्त आनी लेखर जुजे मिनिनो दे रोझारिया फुर्तादो (70) हे संवसाराक अंतरले. तांच्या मरणाचें दाल्गादो कोंकणी अकादमीन दुख्ख उक्तायलां.
साश्ट तालुक्यांतल्या सोरझारो हांगच्या फुर्तादो हांणी पिरायेच्या 18 वर्सां सावन बरोवपाक सुरवात केल्ली. तांणी लघुकथा, कविता, निबंद आनी तियात्र हे लेखन प्रकार हाताळ्ळे. ‘दिलां त्या मापान घे, येतोलो देंवचार गोमतलो संवसार, घराब्याचें निसंतान, इश्टागोत, कांटे आनी ल्हारां ‘ ही फामाद तियात्रां तांणी बरयल्यांत. ‘आयली फूर मुमरांत पूर, बयमान, चूक, फुडार, जिजस म्हाका भोगोस, रुख आनी तुका लागून’ ही नॉन-स्टॉप तियात्रां तांणी बरयल्यात. तांच्या ‘जोयत’ हे कादंबरीक 1980 वर्साचो कोंकणी भाशा मंडळाचो पुरस्कार फावो जाल्लो. तांच्या आयली फूर मुमरांत पूर ह्या नॉन- स्टॉप तियात्राक इंटरनॅशनल इयर ऑफ चायल्ड पुरस्कार फावो जाल्लो. 2012 वर्सा तांकां दाल्गादो साहित्य पुरस्कार फावो जाल्लो.
दाल्गादो कोंकणी अकादमीचो अध्यक्ष व्हिन्सी काद्रूस आनी कार्यकारी समितीन फुर्तादो हांच्या मरणाक लागून दुख्ख उक्तायलां. तांच्या मरणान कोंकणी भाशेचें सामकें लुकसाण जालां अशें अकादमीन म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
