भांगरभूंय | प्रतिनिधी
संवसारीक फुटबॉल सर्तीच्या सी गटांतले मॅचींत पोलंडान सावदी अरेबियाक 2-0 अशा गोल फरकांनी हारयलो. मॅचींतलो पयलो गोल 39व्या मिनटाक पोलंडाच्या जिलेंस्कीन केलो. जाल्यार दुसरो गोल मुखेली रॉबर्ट लेवानडॉस्कीन केलो.
सावदी अरेबियान आपले पयले मॅचींत बळिश्ट अर्जेंटिनाक 2-1 अशा गोल फरकांनी हारयिल्लो. ताका लागून आयचे मॅचींत लेगीत ताच्या कडल्यान अश्याच प्रदर्शनाची आस्त आशिल्ली. पूण, पोलंडा मुखार ताचें कांयच शाणपण चलूंक ना. मजगतीं, ह्या जैतान पोलंड चार गुणा सयत पयले सुवातेर पावलो. सावदी अरेबिया तीन गुणां सयत दुसरे, जाल्यार मॅक्सिको एका गुणा सयत तिसरे सुवातेर आसा. जाल्यार अर्जेंटिना निमाण्या म्हणल्यार चवथे सुवातेर आसा.
मजगतीं, लेवानडॉस्कीन बॉल सावदीच्या गोल पोस्टा वटेन घेवन गेलो. ताका दोन डिफॅण्डरांनी बांदून दवरिल्लो. पूण, लेवानडॉस्कीन संद सोदून बॉल जिलेंस्कीक दिलो. जिलेंस्कीन कसलीच चूक करिनासतना बॉल जाळांत घालो.
ते उपरांत 45व्या मिनटाक सावदीक पॅनल्टी मेळिल्ली. पॅनल्टी बॉक्सांत पोलंडाच्या खेळगड्यान आडांगी खेळ करीत सावदीच्या अल शेहरीक जमनीर उडयलो. ताका लागून रॅफ्रीन पॅनल्टी दिली. सावदी वतीन सलेम अलदावसारीन पॅनल्टी शॉर्ट मारलो. पूण, पोलंडाचो गोलकीपर जेसनी शूट आडायली. बॉल रिबावण्ड जावन सावदीच्या अल बेरिका कडेन गेलो. ताणें गोलपोस्टा वटेन बॉल मारलो. पूण, गोलकीपर जेसनीन परतून एकदां गोल पडपा पसून आडायलो. ते उपरांत सावदीक रोखडोच कॉर्नर मेळ्ळो. पूण, कॉर्नराचेरूय गोल करपाक तांकां जमूंक ना.
पोलंडान 82व्या मिनटाक पंगडाचो दुसरो गोल केलो. सावदीचो डिफॅण्डर अल माल्कीक आपल्याच पॅनल्टी बॉक्सांत बॉलाचेर नियंत्रण दवरपाक जमलें ना. लेवानडॉस्कीन ताच्या कडल्यान बॉल काडून घेतलो आनी गोलकीपराक चकयत बॉल गोलपोस्टांत घालो.
लेवानडॉस्कीचो हो 77वो आंतरराष्ट्रीय आनी संवसारीक सर्तींतलो पयलो गोल थारलो.
सावदीन पुर्ण मॅचींत आक्रमक खेळ केलो. ताणें प्रतिस्पर्धी पंगडाचेर दवरलें. पूण, ताका गोल करपाक जमलो ना. पोलंडाच्या जैतांत ताच्या गोलकीपराची म्हत्वाची भुमिका आसा. पॅनल्टी आडावपा खेरीत ताणें साबार खेपे बॉलाक गोलपोस्टांत वचपा पसून आडायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
