भांगरभूंय | प्रतिनिधी
प्रगती ही म्हत्वाची आसताच पूण तातूंत नितळसाण ही कमी म्हत्वाची न्हय.
आमी दिसयभर कितलेशेंच काम करतात. आनी त्या कामा पासून आमी थोडे भोव तरी भायर उडोवपाचे पदार्थ तयार करताच. आनी मागीर त्याच वस्तूंचो वापर जाले उपरांत आमी तेय भायर, मेळटा थंय उडोवन दितात. आनी ह्याच वस्तूंक आमी कचरो वा कोयर अशें म्हणटात. आनी हो कचरो दुसरो कोण न्हय जाल्यार आमीच तयार करतात.
कचरो हे मनशांच्या तशेंच प्राण्यांच्या आयुश्यांतलें खूब मोटें संकट. आमकां रोग, दुयेंसांं जातात तीं ह्याच कचऱ्याक लागून जातात. हेच गजाली वेल्यान आमी विचार करपाक शकतात की हो कचरो आमकां कितलो वायट तो. पूण हो कचरो कमी जावपाचें नांव घेना.
गांधीजी सदांच म्हणटाले, “Sanitation is more important than independence.” नितळसाण हो गांधीजीच्या आयुश्याचो खूब मोटो भाग आशिल्लो. पूण आमी हो कचरो करून नितळसाण ही दवरलीच ना.
झेंडो हो आमच्या देशाचें प्रतीक. समज आमच्या ह्याच प्रतिकाक कोणेंय नांव दवरलें जाल्यार आमी रोखडेच झगडूंक सुरवात करतात. पूण हो झेंडो ज्या देशाचें प्रतीक आसा, त्या देशान आमकां लोक कचरो करतना दिसले जाल्यार आमकां कांयच फरक पडना. आमी सगळीं हाचेर दुर्लक्ष करतात. आमी जशें आमचें घर नितळ दवरतात तशें आमचो देश नितळ दवरूंक जाय. आमी आमच्या घरांतलो कचरो रोखडोच नितळ करतात. चडसो आमच्या घरांत व्हडलोसो कचरो जावपाकूच दिनात. पूण तेंच जर आमी आमच्या सरभोंवतणी पळयलें जाल्यार आमकां कितलोसोच कचरो दिसता.
आमी फकत गांधी जयंती दिसा हो कचरो नितळ करपाक लागतात आनी मागीर दुसऱ्या दिसाच्यान सगळें विसरून वतात. अशें जावपाक जायना. जसो आमी त्या दिसा कचरो करिनात, कचरो आसल्यार तो काडटात, तशेंच सदांच करपाक जाय. अशें केल्यार दुसऱ्याक कोणाक न्हय जाल्यार आमकांच ताचो फायदो जातलो.
ह्या कचऱ्यांत सगळ्यांत वायट म्हणटा तें ‘प्लास्टीक’. प्लास्टीक ही एक अशी गजाल जी नश्ट जावपाक वर्सांचीं वर्सां लागतात. पावसांत हें प्लास्टीक उदकांत व्हांवन वता आनी मागीर सगळ्यो न्हंयो ह्या प्लास्टीकाक लागून दुशीत जातात. आमचे कडेन सदांच कितलोसोच कचरो तयार जाता. आनी हाकाच लागून घाण वास लेगीत तयार जाता.
समज आमी आतांच हाचेर उपाय काडलो ना जाल्यार ही परिस्थिती खुबूच कठीण जातली. मागीर आमकां शुद्ध हवा, उदक, अन्न मेळपाक सुद्दां खूब त्रास सोंसचे पडटले. ह्या गजालींचेर दुर्लक्ष करून फायदो ना. पयलीं म्हणजे आमी जाता तितलो प्लास्टीकाचो वापर कमी करपाक जाय. ओलो कचरो सांठोवन ताचें आमकां सारें करपाक मेळटा. जाता तितल्यो वस्तू भायर उडोवचे परस तांचो परत वापर करपाक शिकपाक जाय. हाचेर आमी विचार हो करपाकूच जाय. उपाय काडपाकूच जाय. हो कचरो उणो जावपाकूच जाय.
अमेया झांटये
यत्ता णववी, रवीन्द्र केळेकार ज्ञानमंदीर, मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
