भांगरभूंय | प्रतिनिधी
मिसेस फनीबोन्स: शीज जस्ट लायक यू एण्ड लायक मी, हें भारतीय नॉन फिक्शन पुस्तक 2015 वर्सा अभिनेत्री ट्विंकल खन्ना हांणी बरयल्लें आनी पेंग्विन इंडियान उजवाडायल्लें. पुस्तकाच्यो एक लाखां वयर प्रती विकून ट्विंकल खन्ना भारतांतली 2015 वर्साची सगळ्यांत चड पुस्तक लोकां मेरेन व्हरपी बायल लेखिका म्हूण घोशीत जाल्ली. ट्विंकल खन्ना विंगड विंगड राष्ट्रीय दिसाळ्यांचेर सातत्यान लेख बरयतात.
‘मिसेस फनीबोन्स’ ह्या पुस्तकांतली भास आकस्मीक आनी प्रासंगीक आसून लेखक वाचप्यांक तातूंत गुंतवपाचो यत्न करता.
विनोद आनी मुद्दो एकदम प्रतिध्वनीत करता आनी बरपावळींत बुद्धी आनी विनोद खूब वेवस्थीतपणान आनी प्रभावीपणान सांबाळटा. पुस्तकाचें कथन खूब जिवंत आनी उमेदीचें जालां, हाकाच लागून हें पुस्तक वाचून खूब समाधान मेळटा.
ट्विंकल खन्ना ह्या पुस्तकांतल्या पात्रांचेर उलयतना म्हणटा, ‘थोडीं तथ्यां, थोडी कल्पना, थोडें कुसपी मेंदू.’ सस्पेन्स आनी गूढ कसलेंच ना. सरभोंवतवणींच जिती-जिवी पात्रां घेवन आपल्या अणभव आनी कल्पनाशक्तीच्या आदाराचेर बरयल्लें हें पुस्तक.
मिसेस फनीबोन्स हें पुस्तक सगळ्या भारतीयांक आनी खास करून मुंबयकारांक खूब आवडटलें. ट्विंकल खन्ना हांणी आपल्या जिवितांतले वेगळे वेगळे अणभव विनोदी शैलीन मांडल्यात. सगळ्यांत म्हत्वाचें म्हणल्यार खन्ना आपूण फामाद आनी विशेशाधिकार आशिल्ल्या कुटुंबांतल्यान आयल्या हें लिपोवपाचो यत्न करिना. तिका ताचें दुख्ख वा लज दिसना. उरफाटें, हाका लागून तिका फकत बरोवपाची आनी विनोद करपाची चड संद मेळटा. अक्षय कुमार तिचो घोव, राजेश खन्ना तिचो बापूय आनी डिंपल कापाडिया तिची आवय. हीं सगळीं पात्रां ह्या पुस्तकांत आसात. रिक्षांत प्रवास करतना रिक्षावालो तिका वळखना आनी तिकाच अक्षर कुमार आनी राजेश खन्नाच्यो खबरो सांगता तेन्ना ट्विंकल खन्नाच्या मनांतले उमाळे ती पुस्तका वरवीं मांडटा.
पुस्तक चड व्हड ना. वाचप्यांक चड विचार करपाची गरज ना, कारण हें पुस्तक वाचपाक घेतकच एकाच दिसा भितर सोंपोवं येता. इतले सुटसुटीतपणान आनी सोंपे शैलीन बरयल्लें हें पुस्तक आसा. ट्विंकल खन्नान सामकी कॅज्युअल भास वापरल्या, देखून कोणाकूय तें वाचूंक मेळटा. वाचन सुरू
करपाचो हेतू आशिल्ल्या वा वाचनाची गोडी लावपाची आसल्यार हें पुस्तक एकदम योग्य.
चडशे फावटीं सहजपणान आयिल्लो विनोदी आनी जिणेंतल्या दिसपट्ट्या त्रासांचेर ट्विंकल खन्नान सुटसुटीतपणान लिखाण केला. अक्षय कुमाराची घरकान्न आशिल्ल्यान ह्या पुस्तकाची चड प्रसिद्धी जाली काय असो प्रस्न घडये पडूं येता. पूण पुस्तक वाचतकच तुमकां योग्य जाप मेळटली.
तुमच्या आंगांत मजेशीर हाड
आसा अशें दिसल्यार मिसेस फनीबोन्स वाचात आनी तुमच्या हाडांक गुदगुदी जावन हास्य रस भायर सरपाची खात्री आसा. आतां ती बरी गजाल काय वायट तें तुमचेर आसा. तरी लेगीत एक गजाल निश्चीत आसा; थोडे हांसप केन्नाच कोणाक दुखयना.
कात्यायनी घाटवळ
9975293808
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
