भांगरभूंय | प्रतिनिधी
जयदीप मुखर्जीः स्केचींग, सुलेखन, संगीत रचना, दिग्दर्शन हांचो चित्रपटांत आस्पाव
भांगरभूंय । पीआयबी
पणजीः ‘द अदर रेः द आर्ट ऑफ सत्यजीत रे’ ह्या चित्रपटांतल्यान आपणे निर्माते सत्यजीत रे ह्या प्रतिभाशाली मनशाच्या मुळा मेरेन पावपाचो यत्न केला. रे हांचे प्रतिभेचीं वेगवेगळीं तासां म्हणल्यार स्केचींग, सुलेखन, संगीत रचना, दिग्दर्शन ह्या सगळ्यांचो समग्र रितीन चित्रपटांत आस्पाव केला. सत्यजीत रे हांकां सृजनशिलतायेचें दायज आपलो आजो उपेंद्रकिशोर रे चौधरी आनी बापूय सुकुमार सेन हांचे कडल्यान मेळिल्लें. पूण नंदलाल बोस आनी हेर दिग्गजांच्या हाताखाला तांणी शांतिनिकेतनांत मेळिल्लें प्रशिक्षण रे हांच्या कृतींनी स्पश्टपणान दिसता, अशें दिग्दर्शक जयदीप मुखर्जी हांणी सांगलें.
जयदीप मुखर्जी हांचो 34 मिण्टांचें नॉन फिचर फिल्म ‘द अदर रेः द आर्ट ऑफ सत्यजीत रे’ इफ्फींत सत्यजीत रे ह्या विशयाचेर केल्ल्या खाशेल्या विभागाचो एक भाग म्हूण 24 नोव्हेंबराक भारतीय पॅनोरमा विभागांत दाखयलें. पीआयबीन आयोजीन केल्ल्या ‘इफ्फी टेबल टॉक्स’ कार्यावळींत प्रसारमाध्यम आनी प्रतिनिधी कडेन उलयतना सांगलें.
हो चित्रपट म्हणल्यार एक चरित्रात्मक डॉक्युमेंटरी. तातूंत रे हांचे प्रतिभेची आपली स्वताची कल्पना आसा. ह्या चित्रपटांतल्यान रे हांच्या चरित्रचित्रणाचेर हेर प्रभावूय दिसता. देखीक जायरात कंपनी डी. जे. किमार हातूंत तांणी सारिल्लीं वर्सां वा प्राध्यापक अॅलेक्स एरोन्सन हाचे कडल्यान अस्तंती संगिताचें नोटेशन शिकप, जें तांच्या चित्रपटांनी जायत्या ध्वनीमुद्रणां खातीर तांच्यो रचना आनी आर्केस्ट्रेशन प्रक्रियेचो एक भाग आशिल्ल्यो, अशें मुखर्जी हांणी सांगलें. मुखर्जी हांणी एक उगडास सांगलो. तांणी स्वता सत्यजीत रे वांगडा ‘अदर रे’ विशीं चर्चा केल्ली, पूण ताका आकार दिवचे खातीर कितलीशींच दसकां संघर्श करचो पडलो. लंडनांत सर रिचर्ड एमटबरो आनी रे हांच्या हेर इश्टां कडल्यान म्हायती मेळयली, ते भायर आपणें 2007 त कोलकातांत मांडिल्ल्या प्रदर्शनांतली रे हांचें पेंटींग आनी हेर वावराची म्हायती मेळयली, अशेंय मुखर्जी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
